ભૂપેન્દ્ર પટેલ સરકારની બીજી ઇનિંગમાં ગુજરાતીના ચહેરો પર ખુશી આવી જાય તેવા એક મહત્ત્વના બિલને વિધાનસભામાં મંજૂરી આપવામાં આવી છે.હવેથી ગુજરાતની તમામ શાળાઓમાં ગુજરાતી વિષય ફરજિયાત ભણાવવો પડશે, અંગ્રેજી માધ્યમની શાળાઓએ પણ. જે શાળાઓ નિયમોનું પાલન નહીં કરશે તેમની સામે આકરા પગલાંની જાહેરાત પણ કરવામાં આવી છે. ગુજરાતી ભાષાને બચાવવાનું સરકારનું આ એક પ્રસંશનીય પગલું છે. રાજ્યમાં 31 હજાર કરતાં વધુ પ્રાથમિક શાળાઓ છે.
આજે મંગળવારે ગુજરાતના શિક્ષણ મંત્રી કુબેર ડિંડોરીએ ગુજરાતી ભાષા ફરજિયાત કરવા માટેનું એક બિલ વિધાનસભામાં રજૂ કર્યું હતું, જેને મંજૂરીની મહોર મારી દેવામાં આવી છે. ગુજરાતમાં ધોરણ 1થી 8ના વિદ્યાર્થીઓને ગુજરાતી વિષય ફરજિયાત ભણાવવો પડશે.
વિધાનસભામાં આ બિલ રજૂ કરવામાં આવ્યું તેની પર સત્તા પક્ષ અને વિપક્ષના 18 ધારાસભ્યો તેમના વિચારો વ્યકત કર્યા હતા. ગુજરાતમાં અંગ્રેજી માધ્યમની શાળામાં જ બાળકોને મુકવા એવો વાલીઓનો ક્રેઝ દિવસે દિવસે વધતો જતો, જેને કારણે આપણી માતૃભાષા ગુજરાતી ધીમે ધીમે લૂપ્ત થવા માંડી હતી. એ રીતે જોઇએ તો ગુજરાત સરકારે ગુજરાતી ભાષાને જીવંત રાખવાનો પ્રસંશનીય પ્રયાસ કર્યો છે.
ગુજરાતના શિક્ષણ મંત્રીએ વિધાનસભામાં જે બિલ રજૂ કર્યું છે તેમાં કડક પગલાં લેવાની પણ જાહેરાત કરવામાં આવી છે. ગુજરાતની કોઇ પણ શાળા જો પહેલીવાર નિયમોનું ભંગ કરતા પકડાશે તો 50,000 રૂપિયાનો દંડ વસુલવામાં આવશે. બીજી વખત પકડાશે તો 1 લાખ રૂપિયાનો દંડ, ત્રીજી વખત 2 લાખ રૂપિયાનો દંડ થશે અને શાળાની માન્યતા પણ રદ કરી દેવામાં આવશે. અંગ્રેજી માધ્યમની શાળાઓએ પણ ફરજિયાત ગુજરાતી વિષય શીખવવો પડશે.
ગુજરાતી તમામ શાળાઓ અને શિક્ષણ બોર્ડને આ નિયમ લાગૂ પડશે. દંડ ઉપરાંત સજાની જોગવાઇ પણ રાખવામાં આવી છે. સરકારે બિલમાં જે જોગવાઇ કરી છે તે મુજબ ગુજરાતી ભાષા દરેક શાળા ભણાવે તેનો અમલ કરાવવા માટે સરકાર નાયબ નિયામકની નિમણૂંક કરશે. જે શાળાઓ નિયમનું પાલન ન કરે તેને સજાની જોગવાઇ કરતા પહેલાં સાંભળવી પડશે અને બિન ગુજરાતી વિદ્યાર્થીઓના માતા પિતા કારણો સાથે વિનંતી કરશે તો તેમને ગુજરાતી અભ્યાસથી મૂક્તિ આપવામાં આવશે.
Khabarchhe.Com ગુજરાતના અગ્રણી ન્યૂઝ પોર્ટલમાંનુ એક છે અને અમે સરકારના આ નિર્ણયને આવકારીએ છીએ, કારણકે માતૃભાષાને બચાવવી જરૂરી છે.
15.jpg)
