અમૂલનું નામ આવતાં જ ગુજરાતનું ચિત્ર ઉભરી આવે છે. દેશમાં દૂધ ઉત્પાદનમાં ગુજરાત અગ્રેસર રાજ્ય છે, આ બધાની વચ્ચે ગુજરાતના પાટણ જિલ્લામાં એક યુવકે ડોન્કી ફાર્મ ખોલીને દૂધનો અનોખો વ્યવસાય શરૂ કર્યો છે. આ યુવક દર મહિને ઓનલાઈન દૂધ વેચીને બેથી ત્રણ લાખ રૂપિયા કમાઈ રહ્યો છે. આ યુવકે ફાર્મ હાઉસમાં 43 ગધેડીઓ રાખી છે. તેમનું દૂધ પાંચ હજાર રૂપિયા પ્રતિ લિટરે વેચાઈ રહ્યું છે. ગધેડીના દૂધની કિંમત પરંપરાગત દૂધ કરતાં 70 ગણી વધારે છે.
ગુજરાતના પાટણ જિલ્લાના રહેતા ધીરેન સોલંકીએ તેના ગામમાં 42 ગધેડા સાથે ગધેડાનું ફાર્મ બનાવ્યું છે. હવે તેઓ દક્ષિણના રાજ્યોમાં ગધેડાનાં દૂધની ઓનલાઈન સપ્લાયને કારણે ચર્ચામાં આવ્યા છે. મીડિયા સાથે વાત કરતાં સોલંકીએ કહ્યું કે, હું સરકારી નોકરીની શોધમાં હતો. મને અમુક નોકરીઓ મળી પણ આ નોકરીઓમાંથી મળતા પગારથી મારા પરિવારનો ખર્ચ માંડ માંડ પૂરો થઈ શકતો હતો. આ દરમિયાન, મને દક્ષિણ ભારતમાં ગધેડા પાળવા વિશે જાણવા મળ્યું. હું કેટલાક લોકોને મળ્યો અને લગભગ 8 મહિના પહેલા મારા ગામમાં આ ફાર્મની સ્થાપના કરી. ધીરેન અનુસાર, તેણે 20 ગધેડા અને 22 લાખ રૂપિયાના રોકાણથી શરૂઆત કરી. હવે તેની પાસે કુલ 42 ગધેડા છે.
ધીરેનના કહેવા પ્રમાણે, શરૂઆતમાં ઘણી સમસ્યાઓ હતી. પાંચ મહિના સુધી કંઈ કમાઈ ન શક્યો પણ જ્યારે મેં દક્ષિણ ભારતની કંપનીઓમાં દૂધ મોકલવાનું શરૂ કર્યું, ત્યારે મારી આવક થવા લાગી. સોલંકીના જણાવ્યા મુજબ, ગધેડી (માદા ગધેડી)ના દૂધની માંગ છે. ધીરેન હવે નિયમિતપણે કર્ણાટક અને કેરળમાં સપ્લાય કરે છે. તેમના ગ્રાહકોમાં કોસ્મેટિક કંપનીઓ પણ છે, જેઓ તેમના ઉત્પાદનોમાં ગધેડીના દૂધનો ઉપયોગ કરે છે. ધીરેન સોલંકીના જણાવ્યા અનુસાર, ગાયનું દૂધ 65 રૂપિયા પ્રતિ લીટર સુધી વેચાય છે. ગધેડીના દૂધની કિંમત પાંચ હજારથી સાત હજાર રૂપિયા સુધીની હોય છે.
ધીરેનના જણાવ્યા અનુસાર માદા ગધેડીમાંથી મેળવેલ દૂધ કાઢીને ફ્રીઝરમાં સંગ્રહિત કરવામાં આવે છે. ગધેડીના દૂધને પણ સૂકવીને વેચવામાં આવે છે. એક કિલો દૂધના પાઉડરની કિંમત 1 લાખ રૂપિયા સુધીની પણ હોઈ શકે છે. સોલંકીના ફાર્મમાં હવે 42 ગધેડા છે અને તેણે અત્યાર સુધીમાં લગભગ 38 લાખ રૂપિયાનું રોકાણ કર્યું છે. સોલંકીએ હજુ સુધી રાજ્ય સરકાર પાસેથી કોઈ મદદ લીધી નથી. પ્રાચીન કાળ વિશે એવું કહેવાય છે કે, ઇજિપ્તની રાણી ક્લિયોપેટ્રા ગધેડીના દૂધથી સ્નાન કરતી હતી. ગધેડીના દૂધનો ઉપયોગ દવાઓ બનાવવામાં પણ કરવામાં આવતો હતો.
