સુપ્રીમ કોર્ટમાં રાહત,પણ અમદાવાદ કોર્ટે તિસ્તા સેતલવાડને આપ્યો મોટો ઝટકો

ગુજરાતમાં અમદાવાદની એક સેશન્સ કોર્ટે 2002ના રમખાણોના સંબંધમાં કથિત રીતે બનાવટી પુરાવાઓ તૈયાર કરવા માટે સામાજિક કાર્યકર્તા તિસ્તા સેતલવાડની આરોપમાંથી મુક્તિની માંગ કરતી અરજીને ફગાવી દીધી છે. અરજી ફગાવી દેતી વખતે, એડિશનલ સેશન્સ જજ A.R. પટેલે પ્રોસિક્યુશન અને ડિફેન્સને 24 જુલાઈથી (ટ્રાયલની કાર્યવાહી શરૂ) કરવાનું પણ કહ્યું હતું.

ગુજરાત સરકારે તેની અરજીનો વિરોધ કરતા કહ્યું કે, તેણે રમખાણ પીડિતોનો વિશ્વાસ તોડ્યો છે અને નિર્દોષ લોકોને ફસાવ્યા છે. ગુજરાત હાઈકોર્ટે રાહત આપવાનો ઈન્કાર કર્યા પછી બુધવારે સુપ્રીમ કોર્ટે આ જ કેસમાં સેતલવાડને જામીન આપ્યા હતા.

સેતલવાડ અને અન્ય બે-રાજ્યના ભૂતપૂર્વ પોલીસ મહાનિર્દેશક R.B. શ્રીકુમાર અને ભૂતપૂર્વ ભારતીય પોલીસ સેવા અધિકારી સંજીવ ભટ્ટની 2002 રમખાણોના કેસમાં ગુજરાત સરકારના અધિકારીઓને ફસાવવાના ઈરાદા સાથે બનાવટી અને ખોટા પુરાવાઓ બનાવવા બદલ શહેર ક્રાઈમ બ્રાન્ચ દ્વારા જૂન 2022માં ધરપકડ કરવામાં આવી હતી.

જજ A.R. પટેલે અગાઉ શ્રીકુમારની ડિસ્ચાર્જની અરજીને ફગાવી દીધી હતી. ભટ્ટે હજુ સુધી આવી રાહત માંગી નથી. સેતલવાડ દ્વારા દાખલ કરાયેલ ડિસ્ચાર્જ અરજીનો વિરોધ કરતા, રાજ્ય સરકારે તેના લેખિત જવાબમાં આરોપ મૂક્યો હતો કે, સેતલવાડે તત્કાલિન CM (નરેન્દ્ર મોદી), વરિષ્ઠ અધિકારીઓ અને મંત્રીઓ સહિત નિર્દોષ લોકોને ફસાવવા માટે રમખાણો પીડિતોના નામની એફિડેવિટ તૈયાર કરી હતી.

સરકારે સેતલવાડની NGO 'સિટીઝન્સ ફોર પીસ' સાથે કામ કરતા રઈસ ખાન પઠાણ તેમજ નરેન્દ્ર બ્રહ્મભટ્ટ અને રમખાણ પીડિતા કુતુબુદ્દીન અંસારી સહિતના સાક્ષીઓના નિવેદનો પર આધાર રાખ્યો છે. બ્રહ્મભટ્ટે દાવો કર્યો હતો કે, કોંગ્રેસના દિવંગત નેતા અહેમદ પટેલે કથિત રીતે કાર્યકર્તાને 30 લાખ રૂપિયા આપ્યા હતા.

સેતલવાડ દ્વારા તૈયાર કરાયેલા રમખાણોના પીડિતોના સોગંદનામા અને કોર્ટ સમક્ષ નોંધાયેલા તેમના નિવેદનોમાં પણ સરકારે વિરોધાભાસ દર્શાવ્યો હતો. સરકારના સોગંદનામામાં કહેવામાં આવ્યું છે કે, આરોપીઓ સામે ચાર્જશીટ દાખલ કરવા માટે પૂરતા પુરાવા અને કારણો છે.

નિર્દોષ લોકોને ફસાવવા માટે પુરાવા બનાવ્યાના આરોપોને નકારી કાઢતા, સેતલવાડના વકીલે કહ્યું હતું કે, જે સોગંદનામા ખોટા હોવાનું જણાયું છે તે, સાક્ષીઓ દ્વારા સહી કરવામાં આવ્યા હતા અને વિવિધ અદાલતો સમક્ષ રજૂ કરવામાં આવ્યા હતા.

બચાવ પક્ષે કહ્યું કે તેથી આ સોગંદનામાને 'બનાવટી પુરાવા' તરીકે ગણી શકાય નહીં. સામાજિક કાર્યકરના વકીલે કહ્યું હતું કે, આ સોગંદનામાના આધારે અદાલતોએ સાક્ષીઓની જુબાની નોંધી છે.

ઝાકિયા જાફરીની અરજી પર 24 જૂન, 2022ના રોજ સુપ્રીમ કોર્ટના ચુકાદાના એક દિવસ પછી, સેતલવાડ, ભટ્ટ અને શ્રીકુમાર સામે બનાવટી પુરાવાનો કેસ નોંધવામાં આવ્યો હતો. ઝાકિયાએ આરોપ લગાવ્યો હતો કે, ગોધરાકાંડ પછી થયેલા કોમી રમખાણો પાછળ એક મોટું કાવતરું હતું. તે કોંગ્રેસના દિવંગત પૂર્વ સાંસદ એહસાન જાફરીની પત્ની છે, જેમની રમખાણો દરમિયાન હત્યા કરવામાં આવી હતી. જૂન 2022માં, સર્વોચ્ચ અદાલતે (હવે PM) નરેન્દ્ર મોદી અને અન્ય રાજ્ય અધિકારીઓને આપવામાં આવેલી ક્લીનચીટને સમર્થન આપ્યું હતું.