'મારો દીકરો દિવસમાં 10 છોકરીઓ સાથે સૂતો હોય પણ રાત્રે તો તારી પાસે આવે છે ને'

આણંદ ખાતે રહેતા એક યુવક સાથે અમદાવાદની યુવતીના લગ્ન થયા હતા. લગ્ન બાદ પતિના ફોનમાં કોઇ છોકરીનો ફોન આવ્યો હોવાનું જાણતા આ યુવતીએ તેના પતિને આ બાબતે પૂછ્યું હતું. જેના કારણે તેનો પતિ આવેશમાં આવી ગયો હતો. જો કે, તેમના નિકાહ પહેલા જ તે છોકરી સાથે તેના પતિનો પ્રેમ સંબંધ હોવાનું યુવતીને જાણ થતા આ બાબતે યુવતીએ પોતાની સાસુને જણાવ્યું હતું જે બાદ સાસુએ યુવતીને એવો ઉડાઉ જવાબ આપ્યો હતો કે, 'મારો દીકરો દિવસમાં 10 છોકરીઓ સાથે સૂતો હોય પણ રાત્રે તો તારી પાસે આવે છે ને' આવો જવાબ આપીને તેણે તેના દીકરાનો પક્ષ લીધો હતો.

બાદમાં પતિ અને નણંદ બંને ભેગા મળીને આ યુવતી પાસે દહેજની માંગ કરતાં હતા તેમજ યુવતીને માર મારી ત્રાસ આપતા હતા. આટલું ઓછું હોય તેમ ત્રણ વાર પતિએ 'તલાક' કહી દેતા આખરે આ સમગ્ર મામલે યુવતીએ પોલીસમાં ફરિયાદ નોંધાવતા પોલીસે તપાસ શરૂ કરી છે.

આણંદ ખાતે રહેતા એક યુવક સાથે હાલ, અમદાવાદના જમાલપુર વિસ્તારમાં રહેતી 26 વર્ષીય યુવતીના લગ્ન  થયા હતા. આ યુવતીના લગ્ન વર્ષ 2022મા મુસ્લિમ રિવાજ મુજબ થયા બાદ તે તેના સાસરે રહેવા ગઈ હતી. જે બાદ લગ્નના બે દિવસ પછી આ યુવતીના પતિના ફોન પર એક છોકરીનો ફોન આવ્યો હતો. જો કે, આ બાબતે પતિને યુવતી દ્વારા પૂછવામાં આવતા પતિ ઉશ્કેરાઈ ગયો હતો અને યુવતીને ગાળો આપવા લાગ્યો હતો. જે બાદ યુવતીના પતિનો લગ્ન પહેલા જ આ છોકરી સાથે પ્રેમ સંબંધ હોવાનું યુવતીને જાણવા મળ્યું હતું.

જેના થોડા દિવસો બાદ સાસરીમાંથી રિસાઈને આવેલી યુવતીની નણંદ અને ઘરના તમામ લોકોએ ભેગા મળી યુવતી સાથે ઘરકામ બાબતે બબાલ કરી તેને માર માર્યો હતો અને અમે અમારી દીકરીઓને કેટલું બધું આપ્યું છે તું દહેજમાં કંઈ લાવી નથી તેમ કહી દસ લાખ રૂપિયા લઈ આવવા માટેની માંગ કરી હતી.

જો કે, સાસરિયાઓ દ્વારા કરવામાં આવેલી દહેજની માંગ બાદ યુવતીએ દહેજ લાવવાની ના પાડતા યુવતીનો પતિ આવેશમાં આવી ગયો હતો અને તેને માર મારવા લાગ્યો હતો. જે દરમ્યાન ત્યાં હાજર તેની નણંદે તેના બંને હાથ પકડી રાખતા તેના પતિએ તેને માર મારી મૌખિક ત્રણ વાર 'તલાક-તલાક-તલાક' બોલીને તેને ઘરમાંથી કાઢી મૂકી હતી.

આ સાથે જ યુવતીના પતિએ આ સમગ્ર બાબતને લઈને અમારા વિરુદ્ધ ફરિયાદ કરીશ તો જાનથી મારી નાખીશ તેવી ધમકી પણ આપી હતી. જો કે, સમગ્ર બાબતને લઈને યુવતીએ હિંમત કરીને પોલીસમાં ફરિયાદ આપતા પોલીસે ગુનો નોધી તપાસ શરૂ કરી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.