3.59 કરોડ ગ્રાહકોએ 1 વર્ષમાં એક પણ સિલિન્ડર ભરાવ્યું નથી

LPGની વધતી જતી મોંઘવારી વચ્ચે, માહિતીના અધિકારમાં બહાર આવ્યું છે કે ત્રણ જાહેર ક્ષેત્રની ઓઇલ માર્કેટિંગ કંપનીઓના કુલ 3.59 કરોડ ઘરેલું ગેસ કનેક્શન ધારકોએ ગયા નાણાકીય વર્ષ 2021-22 દરમિયાન એક પણ સિલિન્ડર ભરાવ્યું ન હતું. જ્યારે, 1.20 કરોડ ગ્રાહકોએ આખા વર્ષમાં માત્ર એક જ સિલિન્ડર ભરાવ્યું છે. અત્રે ઉલ્લેખનીય બાબત એ છે કે, આ ગ્રાહકો ગરીબ પરિવારની મહિલાઓ માટે ચલાવવામાં આવતી પ્રધાનમંત્રી ઉજ્જવલા યોજના (PMUY)ની સાથે સંકળાયેલા નથી. PMUY હેઠળ, ગ્રાહકોને સરકારી સબસિડીવાળા ઘરેલું ગેસ સિલિન્ડર આપવામાં આવે છે. નીમચ સ્થિત RTI કાર્યકર્તા ચંદ્રશેખર ગૌરે જણાવ્યું કે તેમને માહિતી અધિકાર કાયદા હેઠળ ઘરેલું ગેસ ગ્રાહકો સાથે સંબંધિત માહિતી મળી છે.

માહિતી અનુસાર, 2021-22 દરમિયાન ઇન્ડિયન ઓઇલ કોર્પોરેશનમાં ઘરેલું ગેસનું એક પણ સિલિન્ડર ન ભરનારા નોન-PMUY ગ્રાહકોની સંખ્યા 2.80 કરોડ હતી, જ્યારે આ સમયગાળા દરમિયાન કંપનીના 62.10 લાખ નોન-PMUY ગ્રાહકોમાંથી માત્ર એક ગ્રાહકે જ સિલિન્ડર ભરાવ્યું હતું. RTI હેઠળ ગૌર દ્વારા પ્રાપ્ત વિગતો દર્શાવે છે કે હિન્દુસ્તાન પેટ્રોલિયમ કોર્પોરેશનના નોન PMUY ગ્રાહકોની શ્રેણીમાં 49.44 લાખ લોકોએ ઘરેલું ગેસનું એક પણ સિલિન્ડર ભરાવ્યું નથી, જ્યારે 33.58 લાખ લોકોએ 2021-22માં માત્ર એક સિલિન્ડર ભરાવ્યું હતું. તેવી જ રીતે, ભારત પેટ્રોલિયમ કોર્પોરેશનમાં, 2021-22 દરમિયાન ઘરેલું ગેસના 30.10 લાખ નોન PMUY ગ્રાહકોએ એક પણ સિલિન્ડર ભરાવ્યું ન હતું, જ્યારે આ શ્રેણીના 24.62 લાખ ગ્રાહકો એવા હતા જેમણે વર્ષમાં માત્ર એક સિલિન્ડર ભરાવ્યું હતું.

અર્થશાસ્ત્રી જયંતિલાલ ભંડારીએ જણાવ્યું હતું કે, LPGની વધતી મોંઘવારીથી સામાન્ય લોકો પરેશાન છે. તેથી એવું બની શકે કે, ઘણા ગરીબ લોકો, ખાસ કરીને ગ્રામીણ વિસ્તારોમાં રહેતા લોકો, લાકડા, ગોબર અને કોલસા જેવા સસ્તા પરંપરાગત ઇંધણ તરફ વળ્યા હશે. તેમણે એમ પણ કહ્યું કે, શહેરી વિસ્તારોમાં પાઈપલાઈન દ્વારા ઘરોમાં પૂરો પાડવામાં આવતો LPGનો પુરવઠો સિલિન્ડરો પર લોકોની નિર્ભરતામાં ઘટાડોનું કારણ હોઈ શકે. ઈન્દોરના એક ગેસના વેપારીએ જણાવ્યું કે ચાર જણનો પરિવાર સામાન્ય રીતે વર્ષમાં આઠથી 12 સિલિન્ડર ઘરેલુ ગેસ ભરાવે છે. જો કે, આ આંકડો દેશભરના પરિવારોને લાગુ પડતો નથી, કારણ કે સિલિન્ડરનો વાર્ષિક વપરાશ પરિવારની આર્થિક સ્થિતિ અને સ્થાનિક હવામાનની પરિસ્થિતિઓના આધારે અલગ-અલગ હોઈ શકે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.