જ્યાં સુધી હિંદુ-મુસ્લિમ એક હશે, ત્યાં સુધી વિદેશી તાકાતો હારતી રહેશેઃ ભાગવત

રાષ્ટ્રીય સ્વયંસેવક સંઘ (RSS)ના વડા મોહન ભાગવતે કહ્યું છે કે, જે દેશો ભારતની પ્રગતિ નથી ઈચ્છતા તેઓ અહીંના સમાજને વિભાજિત કરવાનો પ્રયાસ કરી રહ્યા છે. મંગળવારે નાગપુરના જગન્નાથ મંદિરની મુલાકાત લીધા પછી, તેમણે કહ્યું, 'દુષ્ટ શક્તિઓ ભારતની પ્રગતિનો વિરોધ કરે છે અને આંતરિક ઝઘડાને ભડકાવીને મુશ્કેલી ઉભી કરવા તત્પર છે.'

સંઘ પરિવાર સંચાલિત માધવ નેત્રાલય દ્વારા આયોજિત પુસ્તક 'નેત્ર સંજીવની'ના વિમોચન માટેના એક કાર્યક્રમમાં બોલતા RSSના વડાએ કહ્યું કે, 'ભાગલા પાડો અને રાજ કરો'ની બ્રિટિશ નીતિનો ઉપયોગ કેટલાક દેશો તેમના સ્વાર્થી ધ્યેયો પૂરા કરવા માટે કરી રહ્યા છે. અખંડ ભારતને આ બાહ્ય શક્તિઓથી હરાવી શકાય નહીં.'

ભાગવતે કહ્યું કે 1857 પછી બ્રિટિશ રાજે દેશમાં 'ભાગલા પાડો અને રાજ કરો'ની પદ્ધતિસરની નીતિ અપનાવી હતી. તેમણે કહ્યું કે 'બંગાળના ભાગલા સમયે અંગ્રેજોએ હિંદુઓ અને મુસલમાનોને વિભાજિત કરવાનો પ્રયાસ કર્યો હતો, પરંતુ તેઓ નિષ્ફળ રહ્યા હતા, કારણ કે તે દરમિયાન દેશના લોકો એક થઈને તેની સામે લડ્યા હતા, પરંતુ 1947માં તેઓ (બ્રિટિશ) સફળ થયા અને તેનું પરિણામ આપણી સામે છે.'

ભાગવતે કહ્યું કે, શૈતાની શક્તિઓ ભારતની પ્રગતિનો વિરોધ કરી રહી છે અને આંતરિક વિખવાદને ભડકાવીને અશાંતિ ફેલાવવાનો ઇરાદો ધરાવે છે. આ સાથે સંઘ પ્રમુખે એકબીજા સાથે સુમેળમાં રહેવાના મહત્વ પર પણ ભાર મૂક્યો હતો. તેમણે કહ્યું, 'જ્યાં સુધી આપણે એક છીએ, ત્યાં સુધી દુનિયામાં એવી કોઈ શક્તિ નથી જે આપણને હરાવી શકે. તેથી જ તેઓ આપણને તોડવાનો પ્રયાસ કરે છે.'

સંઘના વડાએ ભારપૂર્વક કહ્યું કે, ભારતમાં સદીઓથી મુસ્લિમોને સુરક્ષિત રાખવામાં આવ્યા છે. ભારતીયો ભૂલી રહ્યા છે કે, આપણે એક છીએ. વિભાજન અંગ્રેજોના કારણે થયું, જેમણે ભારતમાં કોમવાદના બીજ વાવ્યા. અંગ્રેજોએ મુસ્લિમોને કહ્યું કે, જો તેઓ હિંદુ બહુમતીવાળા રાજ્યમાં હશે તો તેમને કોઈ સત્તા, પદ કે પ્રભાવ નહીં મળે. તેમણે એ જ રીતે હિંદુઓને મુસ્લિમો સાથે રહેવાના જોખમો વિશે ખાતરી આપી, જેમનો તેમણે દાવો કર્યો હતો કે તેઓ પ્રકૃતિમાં ઉગ્રવાદી હતા.

ભાગવતે કહ્યું, 'જ્યાં સુધી આપણે સાથે છીએ, ત્યાં સુધી દુનિયાની કોઈ એવી શક્તિ નથી જે આપણને હરાવી શકે. તેથી જ તેઓ આપણને તોડવાનો પ્રયાસ કરે છે.' તેમણે આગળ કહ્યું, 'કેટલાક દેશો જે નથી ઈચ્છતા કે ભારત પ્રગતિ કરે, તે દેશમાં સમાજને વિભાજિત કરવાનો પ્રયાસ કરી રહ્યા છે. આ દળો લોકોમાં દુશ્મનાવટ ઉભી કરવા માટે વિવિધ મુદ્દાઓનો ઉપયોગ કરી રહ્યા છે. આપણે સરહદ પર બેઠેલા દુશ્મનોને આપણી તાકાત નથી બતાવી રહ્યા, પરંતુ આપણે પરસ્પર લડી રહ્યા છીએ. આપણે ભૂલી રહ્યા છીએ કે આપણે એક દેશ છીએ.'

આ અગાઉ, આ મહિનાના પ્રથમ સપ્તાહમાં, સત્તાધારી ભારતીય જનતા પાર્ટીના વૈચારિક માર્ગદર્શકે કહ્યું હતું કે, ભારતમાં મુસ્લિમ સમુદાય 'સલામત' છે. તેમણે નાગપુરમાં એક કાર્યક્રમમાં કહ્યું હતું કે, ભારત કરતાં ઈસ્લામ ક્યાં વધુ સુરક્ષિત છે? તેમણે કહ્યું હતું કે, 'જો કે આપણે બધા જુદા દેખાતા હોઈએ છીએ અને અલગ-અલગ ધર્મોને અનુસરીએ છીએ, પરંતુ આપણે બધા એક જ માતૃભૂમિ- ભારતના રહેવાસી છીએ.'

સંઘના વડાએ તાજેતરના સમયમાં વારંવાર એવું પણ કહ્યું છે કે, ભારતમાં રહેતા લોકો 'હિંદુ મૂળ' ધરાવે છે, કારણ કે તેમના પૂર્વજો હિંદુ હતા અને આ રીતે ભારતમાં રહેનાર દરેક વ્યક્તિ હિંદુ બની જાય છે, પછી ભલે તે આજે અલગ અલગ ધર્મોનું પાલન કરતા હોય. તેમણે કહ્યું હતું કે, મુસ્લિમોની ઇબાદતની રીતો અલગ-અલગ હોઈ શકે છે, પરંતુ બધાનું મૂળ એક જ છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.