અયોધ્યાના રામ દરબારનો 'નવો નકશો' જાહેર, ભક્તો માટે મળશે આ સુવિધાઓ

અયોધ્યામાં રામ મંદિર બનવાની સાથે સાથે રામ જન્મભૂમિ સંકુલને પણ સજાવવાનું કામ ચાલી રહ્યું છે. સંકુલમાં આવનારા શ્રદ્ધાળુઓની સુવિધા માટે ખાસ કાળજી રાખવામાં આવી રહી છે. આ દરમિયાન અયોધ્યા મંદિરનો નવો નકશો સામે આવ્યો છે.

श्री राम मंदिर निर्माण कार्य की प्रगति का चलचित्र आप सबके साथ साझा कर रहा हूँ। pic.twitter.com/zpJAbzye4n

— Champat Rai (@ChampatRaiVHP) September 14, 2023

ઉત્તર પ્રદેશના અયોધ્યામાં રામમંદિર નિર્માણનું કામ પૂરજોશમાં ચાલી રહ્યું છે. બની રહેલા આ ભવ્ય મંદિરના નિર્માણની તસવીરો એક પછી એક સામે આવી રહી છે. આજે અમે તમને અયોધ્યાના વિશિષ્ટ નકશા વિશે જણાવવા જઈ રહ્યા છીએ. અયોધ્યામાં ભવ્ય રામ મંદિરના નિર્માણ માટે જે ગતિથી તૈયારીઓ ચાલી રહી છે, તે ઝડપ બતાવી આપે છે કે, રામ ભક્તો ટૂંક સમયમાં અયોધ્યામાં તેમના આરાધ્ય દેવ ભગવાન રામના દર્શન કરી શકશે. સાથે જ આ મંદિરના નિર્માણમાં કોઈ પણ કસર છોડવામાં આવી રહી નથી. મીડિયા સૂત્રોને મળેલો અયોધ્યાનો વિશિષ્ટ નકશો દર્શાવે છે કે, આ આખું સંકુલ તીર્થયાત્રીઓ અને શ્રદ્ધાળુઓ માટે દરેક સુવિધાથી સજ્જ કરવામાં આવશે.

અહીં તમને જણાવી દઈએ કે, અયોધ્યાના રામ મંદિર પરિસરમાં સીતા કુપ, શેષવતાર મંદિર, સપ્ત ઋષિઓનું મંદિર, જટાયુ મૂર્તિ, કુબેર ટેકરી, અંગદ ટેકરી, નળ ટેકરી, ફુલવારી વિસ્તાર, પ્રાચીન શિવ મંદિર, ગાર્ડન કોરિડોર અને ઔષધિઓનો બગીચો હશે. સાથે જ અહીં આવતા શ્રદ્ધાળુઓ/ મુસાફરોની વાત કરીએ તો તેમના માટે તમામ પ્રકારની સુવિધાઓ ઉપલબ્ધ કરવામાં આવશે.

રામ મંદિરમાં ભક્તો માટે વિશેષ સુવિધાઓ પણ હશે. અહીં મંદિરમાં પ્રવેશદ્વારથી લઈને યાત્રી સુવિધા કેન્દ્ર, વહીવટી ભવન, મલ્ટીપર્પઝ હોલ, પાવર સ્ટેશન, મ્યુઝિયમ, VIP ગેસ્ટ હાઉસ, VIP એન્ટ્રી વે, VIP પાર્કિંગની સુવિધા, વોટર બોડી વિસ્તાર પણ હશે. આ ઉપરાંત અહીં ભક્તો માટે વિશેષ ધાર્મિક સભામંડપ પણ બનાવવામાં આવશે.

અયોધ્યા રામ મંદિરમાં પ્રાણ પ્રતિષ્ઠા માટે ચાલી રહેલી તૈયારીઓ સંકેત આપી રહી છે કે, રામ ભક્તોને આ ભેટ ટૂંક સમયમાં અને ભવ્ય રીતે મળવાની છે. તમે જાણી લો કે, મંદિરમાં 22 જાન્યુઆરી, 2024ના રોજ અભિષેક થશે. ભગવાન રામલલા ગર્ભગૃહમાં બિરાજમાન થશે. આ પ્રસંગે મોટી સંખ્યામાં શ્રદ્ધાળુઓ અયોધ્યા પહોંચશે. આ પ્રસંગે PM નરેન્દ્ર મોદી પણ અયોધ્યામાં હાજર રહેશે. રામ ભક્તોની રાહ જોવાનો સમય ટૂંક સમયમાં જ સમાપ્ત થવા જઈ રહ્યો છે. જાન્યુઆરીમાં ભગવાન રામલલા મંદિરમાં બિરાજ્યા પછી રામ ભક્તો તેમના દર્શન કરી શકશે.