અગ્નિપથ ભરતીના નિયમોમાં ફેરફાર, આ ડિગ્રીધારકો પણ કરી શકશે અરજી

PC: thesootr.com

ગયા વર્ષે કેન્દ્રની NDA સરકારે ત્રણેય સેનાઓમાં સૈનિકોની ભરતી માટે અગ્નિપથ યોજનાની જાહેરાત કરી હતી. સરકારે હવે અગ્નિપથ યોજના હેઠળ ભરતીના નિયમોમાં મોટો ફેરફાર કર્યો છે. આ અંતર્ગત ITI-પોલીટેકનિક પાસ આઉટ પણ અરજી કરી શકશે.

સેનાએ અગ્નિપથ ભરતી પ્રક્રિયામાં ભાગ લેવા માટે પાત્રતાના માપદંડમાં વધારો કર્યો છે. પૂર્વ-કુશળ યુવાનો પણ અગ્નિપથ ભરતીમાં ભાગ લઈ શકશે. ITI- પોલિટેકનિક પાસ આઉટ, ટેકનિકલ શાખામાં અરજી કરી શકશે. આનાથી પૂર્વ-કુશળ યુવાનોને વિશેષ પ્રોત્સાહન મળશે. એટલું જ નહીં, તેની તાલીમનો સમય પણ ઓછો હશે. આ મોટા ફેરફાર બાદ હવે વધુ યુવા ઉમેદવારોને આ યોજનામાં જોડાવાની તક મળશે.

અહીં તમને જણાવી દઈએ કે, ગત 16 ફેબ્રુઆરીથી અગ્નિપથ યોજના હેઠળ ભારતીય સેનામાં અગ્નિવીરોની ભરતી માટે નોંધણી શરૂ થઈ ગઈ છે. અગ્નિપથ ભરતી વર્ષ 2023-24 માટે અપરિણીત પુરૂષ ઉમેદવારો સત્તાવાર વેબસાઇટ joinindianarmy.nic.in પર જઈને ઓનલાઈન મોડ દ્વારા અરજી કરી શકે છે. ઓનલાઈન અરજી કરવાની છેલ્લી તારીખ 15 માર્ચ 2023 છે જ્યારે પસંદગી કસોટી 17 એપ્રિલ 2023ના રોજ લેવામાં આવશે.

બહાર પાડેલી સૂચના મુજબ, અગ્નિવીર જનરલ ડ્યુટી, ટેકનિકલ ક્લાર્ક, સ્ટોર કીપર, ટ્રેડ્સમેનની જગ્યાઓ ભરવામાં આવશે. અગ્નિવીર પસંદગી પ્રક્રિયામાં તાજેતરના ફેરફારો પછી, હવે ઉમેદવારોએ પહેલા લેખિત પરીક્ષા પાસ કરવી પડશે. આમાં લાયકાત ધરાવતા ઉમેદવારોને જ શારીરિક કસોટી માટે આમંત્રિત કરવામાં આવશે. લેખિત પરીક્ષા 17 એપ્રિલે લેવામાં આવશે.

16 ફેબ્રુઆરીના રોજ જાહેર કરાયેલા નોટિફિકેશન મુજબ, ધોરણ 10 પાસ ઉમેદવારો અગ્નિવીર (જનરલ ડ્યુટી) (તમામ આર્મ્સ) માટે અરજી કરી શકે છે. જ્યારે, અગ્નિવીર (ટેકનિકલ) (તમામ આર્મ્સ) માટે 12મું પાસ ઉમેદવારો અરજી કરી શકે છે. ઓછામાં ઓછા 60 ટકા માર્ક્સ સાથે 12મું પાસ અગ્નિવીર ક્લાર્ક (સ્ટોર કીપર)ની જગ્યાઓ માટે અરજી કરી શકે છે. 8મું-10મું પાસ ઉમેદવારો અગ્નિવીર ટ્રેડ્સમેનની જગ્યાઓ માટે અરજી કરી શકે છે. હવે થયેલા નવા બદલાવ મુજબ ITI-પોલીટેકનિક પાસ આઉટ યુવાનો પણ અરજી કરી શકશે. આ પ્રશિક્ષિત યુવાનોએ સેનાની ટેકનિકલ શાખામાં અરજી કરવાની રહેશે. તેમની તાલીમ પણ ઓછા સમયની હશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.

ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp