આવશે તો માત્ર PM મોદી જ; ગડકરીએ 2024ની આગાહી કરી, MP-રાજસ્થાનમાં પણ દાવો

રાજકીય બાબતોમાં પોતાની નિખાલસતા માટે જાણીતા કેન્દ્રીય મંત્રી નીતિન ગડકરીએ 2024ની લોકસભા ચૂંટણીની આગાહી કરી છે. તેમનું કહેવું છે કે, PM નરેન્દ્ર મોદીના નેતૃત્વમાં સરકાર 2024માં પહેલા કરતા વધુ સીટો સાથે પરત ફરશે. 2019ની લોકસભા ચૂંટણીમાં BJPએ 300થી વધુ બેઠકો મેળવીને બહુમતની સરકાર બનાવી હતી. રાજસ્થાન, મધ્યપ્રદેશ અને છત્તીસગઢની વિધાનસભા ચૂંટણીને લઈને નીતિન ગડકરીએ એમ પણ કહ્યું કે, અહીં BJPની જ જીત થશે. જોકે, તેમણે તેલંગાણાની ચૂંટણીને લઈને આવો દાવો કર્યો ન હતો અને કહ્યું હતું કે, અમે એક મજબૂત પક્ષ તરીકે ઉભરીશું. ત્યાં અમારી તાકાત પહેલા કરતા વધુ હશે.

મીડિયા સૂત્રો સાથે વાત કરતાં નીતિન ગડકરીએ કહ્યું, 'અમને લોકસભા ચૂંટણીમાં અગાઉ જે બેઠકો મળી હતી તેના કરતાં વધુ બેઠકો મળશે. અમે દેશનું ભવિષ્ય સુધાર્યું છે અને PM નરેન્દ્ર મોદીના નેતૃત્વમાં લોકો અમને ફરીથી જીતાડશે. આ પ્રસંગે કેન્દ્રીય મંત્રીએ મફત વીજળી સહિતની મફત યોજનાઓને પણ ખોટી ગણાવી હતી. તેમણે કહ્યું કે વીજળી કંપનીઓ 18 લાખ કરોડ રૂપિયાના નુકસાનમાં છે. જો આમ જ ચાલતું રહેશે તો આપણું પાવર સેક્ટર ખતમ થઈ જશે. જો ચૂંટણી જીતવી જ હોય તો ગરીબો માટે ઘર બનાવો અને તેમને રોજગાર આપો. જો આપણે લોકોને મફતમાં કંઈક આપીએ છીએ, તો તે તેનું મહત્વ ગુમાવે છે. આ મફત આપવાની રાજનીતિ લોકશાહી માટે ખતરનાક છે.

માર્ગ પરિવહન મંત્રીએ કહ્યું કે, લોકો શિક્ષિત છે અને જાણે છે કે તેમણે કોને મત આપવો જોઈએ. વિપક્ષ અને વિદેશી મીડિયા દ્વારા ભારતમાં લોકશાહી ખતરામાં હોવાનું કહેવા પર નીતિન ગડકરીએ કહ્યું કે એવું નથી. કોઈપણ સિસ્ટમ પોતાના કાયદાથી ચાલે છે, જ્યારે કેટલાક લોકો કાયદા સમક્ષ નિષ્ફળ જાય છે ત્યારે તેઓ આવા આક્ષેપો કરે છે. તેમણે કહ્યું કે, જે કામ કોંગ્રેસે 60 વર્ષમાં નથી કર્યું તે અમે PM નરેન્દ્ર મોદીના નેતૃત્વમાં 10 વર્ષમાં કરી બતાવ્યું છે.

નીતિન ગડકરીએ ગીતા પ્રેસને ગાંધી શાંતિ પુરસ્કાર આપવા અંગે કોંગ્રેસની ટિપ્પણી સામે પણ વાંધો ઉઠાવ્યો હતો. તેમણે કહ્યું કે, આ પ્રકારના નિવેદનો આપીને કોંગ્રેસની આવી હાલત થઇ ગઈ છે. કેન્દ્રીય મંત્રીએ કહ્યું કે, ગાંધીજીને ગીતામાં ઘણી શ્રદ્ધા હતી અને ગીતા પ્રેસે તેના પ્રચાર માટે અદ્ભુત કામ કર્યું છે. તેથી જ ગીતા પ્રેસ સામે ખોટી વાતો કરવી એ ગાંધીજીની વિચારધારા વિરુદ્ધ બોલવા જેવું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.