જમ્મુ-કશ્મીરના પૂંછમાં ગુરુવારે સેનાની ગાડી પર થયેલા આતંકી હુમલામાં 5 જવાનો શહીદ થઈ ગયા છે. એક ઇજાગ્રસ્ત જવાનની સારવાર હૉસ્પિટલમાં ચાલી રહી છે. આ આતંકી હુમલાની જવાબદારી પીપલ્સ એન્ટી ફાસિસ્ટ ફ્રન્ટ (PAFF)એ લીધી છે. તેને પાકિસ્તાની આતંકી સંગઠન જૈશ-એ-મોહમ્મદનું સમર્થિત સંગઠન કહેવામાં આવે છે. PAFF જમ્મુ-કાશ્મીરમાં એક્ટિવ આતંકી સંગઠન છે. PAFF વર્ષ 2019માં જૈશના પ્રોક્સિ આઉટફિટ તરીકે ઉભર્યું હતું. ત્યારથી તે આખા દેશમાં, ખાસ કરીને જમ્મુ-કાશ્મીરમાં આતંકી હુમલાઓને અંજામ આપી રહ્યું છે.
તે પાકિસ્તાનના આતંકી સંગઠન જૈશ-એ-મોહમ્મદ સાથે જોડાયેલું છે. પહેલી વખત સંગઠન વર્ષ 2019માં જ જમ્મુ-કાશ્મીરથી આર્ટિકલ 370 હટ્યા બાદ ચર્ચામાં આવ્યું હતું. PAFF સમય-સમય પર સેના અને સરકારને ઘણી ધમકીઓ આપી ચૂક્યું છે. વર્ષ 2020માં સંગઠને વીડિયો જાહેર કરીને કાશ્મીરમાં ઇઝરાયલ તરફથી 2 સેન્ટર ઓફ એક્સિલેન્સ સ્થાપિત કરવા પર ધમકી આપી હતી. જમ્મુ-કાશ્મીરમાં મે મહિનામાં G-20ની બેઠક થવાની છે. PAFF તેને લઈને લાલચોળ થઈ ગયું છે અને તે બેઠકને લઈને ચેતવણી પણ જાહેર કરી ચૂક્યું છે.
PAFFએ જમ્મુ-કાશ્મીરમાં પહેલા પણ ઘણા હુમલાઓને અંજામ આપ્યો છે. 3 જૂન 2021ના રોજ ભારતીય જનતા પાર્ટી (BJP)ના નેતા રાકેશ પંડિતાની હત્યામાં આ જ સંગઠનનો હાથ હતો. આ એક એવી ઘટના હતી, જેનાથી આ સંગઠન સરકારની રડાર પર આવી ગયું હતું. ત્યારબાદ 11 ઓગસ્ટ 2021ના રોજ સંગઠને ફરી એક વખત રાજૌરી જિલ્લામાં સેના પર હુમલો કર્યો. આ આતંક અહીં ન રોકાયો. તેના બરાબર એક મહિના બાદ 11 ઓક્ટોબર 2021ના રોજ મેંઢાર, પૂંછ જિલ્લામાં ભારતીય જવાનો પર હુમલો કરવામાં આવ્યો હતો, જેમાં સેનાના 9 જવાન શહીદ થઈ ગયા હતા.
આ હુમલાની જવાબદારી પણ PAFFએ લીધી હતી. 3 ઓક્ટોબર 2022ના રોજ જમ્મુ-કશ્મીરના પોલીસ મહાનિર્દેશક (જેલ) હેમંત લોહિયાની તેની ઘરમાં ઘૂસીને હત્યા કરી દેવામાં આવી હતી. આ હત્યા એવા સમયે કરી દેવામાં આવી હતી, જ્યારે ગૃહમંત્રી અમિત શાહ જમ્મુ-કશ્મીરના પ્રવાસે હતા.
કેન્દ્રીય ગૃહ મંત્રાલયે જમ્મુ-કાશ્મીરમાં આતંકી હુમલામાં સંડોવાયેલા આ સંગઠન પર જાન્યુઆરી મહિનામાં બેન લગાવી દીધું હતું, મંત્રાલયે અધિસૂચના જાહેર કરીને કહ્યું હતું કે, PAFF સુરક્ષાબળો, નેતાઓ અને જમ્મુ-કાશ્મીર અને અન્ય રાજ્યોના નાગરિકો માટે સતત જોખમી બનેલું હતું. તે અન્ય સંગઠનો સાથે મળીને જમ્મુ-કાશ્મીર અને દેશના અન્ય મુખ્ય શહેરોના આતંકી હુમલાઓમાં સામેલ રહ્યું.
15.jpg)
