58 કમાન્ડો, 20 ખાનગી ગાર્ડ્સની સુરક્ષામાં રહે છે મુકેશ અંબાણી

દેશની સર્વોચ્ચ અદાલતે ઉદ્યોગપતિ મુકેશ અંબાણી અને તેમના પરિવારને સુરક્ષા કવચ આપવા વિરુદ્ધ દાખલ કરવામાં આવેલી અરજી પર ત્રિપુરા હાઈકોર્ટ દ્વારા કેન્દ્ર સરકારને આપવામાં આવેલા નિર્દેશ પર 29મી જૂને રોક લગાવી દીધી છે. વિકાસ સાહા નામના વ્યક્તિએ અંબાણી અને તેમના પરિવારને આપવામાં આવેલી Z+ સુરક્ષા સામે ત્રિપુરા હાઈકોર્ટમાં જાહેર હિતની અરજી દાખલ કરી હતી. જેના પર હાઈકોર્ટે ગૃહ મંત્રાલયને સમન્સ પાઠવ્યું અને જોખમની આશંકાથી સંબંધિત માહિતી શેર કરવાનો નિર્દેશ આપ્યો. ચાલો તમને જણાવીએ કે દેશના સૌથી ધનિક ઉદ્યોગપતિઓમાંથી એક મુકેશ અંબાણી કયા સ્તરની સુરક્ષામાં રહે છે.

વર્ષ 2013 દરમિયાન મુકેશ અંબાણી અને તેમના પરિવારને તત્કાલીન સરકાર દ્વારા Z સુરક્ષા આપવામાં આવી હતી. જો કે, બાદમાં તેને બદલીને Z+ કરવામાં આવી, કારણ કે તેમના પર આતંકી હુમલાની શક્યતા હતી. અત્રે ઉલ્લેખનીય છે કે, વર્ષ 2013માં અંબાણીને આતંકી સંગઠન હિઝબુલ મુજાહિદ્દીન દ્વારા ધમકી આપવામાં આવી હતી. તે સમયે મુકેશ અંબાણી દેશના પહેલા ઉદ્યોગપતિ હતા, જેમને Z સુરક્ષા મળી હતી.

મુકેશ અંબાણી અને તેમના પરિવારની સુરક્ષા પર દર મહિને લગભગ 15-20 લાખ રૂપિયા ખર્ચવામાં આવે છે અને તે પોતે તેનો ખર્ચ કરે છે. મોટા ભાગના કિસ્સાઓમાં તે સરકાર દ્વારા ચૂકવવામાં આવે છે. જોકે, સુરક્ષા કવચનો ખર્ચ ઉઠાવનાર તે પ્રથમ વ્યક્તિ છે. આ સુરક્ષા કવચ હેઠળ અંબાણીના કાફલામાં NSG, CRPF અને ખાનગી સુરક્ષા ગાર્ડના 6 થી 8 વાહનો દોડે છે.

અંબાણીના સિક્યોરિટી કવરમાં કમાન્ડ ઉપરાંત, ઇઝરાયેલમાંથી તાલીમ પામેલા 20 જેટલા પ્રાઇવેટ ગાર્ડ્સ પણ છે. તે ગાર્ડ્સ નિઃશસ્ત્ર હોવા છતાં, દુશ્મનને મોતને ઘાટ ઉતારી શકે છે. એવું કહેવાય છે કે તેઓને ઇઝરાયેલી સુરક્ષા-ફર્મ દ્વારા તાલીમ આપવામાં આવી છે. આ ઉપરાંત અંબાણીના કાફલાના તમામ વાહનો બુલેટપ્રુફ છે. મુકેશ પોતે તેની 2.5 કરોડની બુલેટપ્રૂફ મર્સિડીઝ કારમાં બહાર જવાનું પસંદ કરે છે. જ્યારે કાફલામાં રહેલા તેમના સુરક્ષા ગાર્ડ્સ મર્સિડીઝ, રેન્જ રોવરની એસયુવીમાં સવારી કરે છે.

મુકેશ અંબાણીની સુરક્ષા ટુકડીમાં સામેલ કમાન્ડો અદ્યતન હથિયારોથી સજ્જ છે. અહેવાલો અનુસાર, અંબાણીની સુરક્ષા ટુકડીમાં સામેલ કમાન્ડો જર્મની નિર્મિત સબ-મશીન ગન હેકલર અને કોચ એમપી-5 સહિત ઘણા અત્યાધુનિક હથિયારોનો ઉપયોગ કરે છે. આ મશીનગનની વિશેષતા એ છે કે તે એક મિનિટમાં 800 રાઉન્ડ ગોળીઓ ફાયર કરી શકે છે. તે જ સમયે, જ્યારે પણ અંબાણી મુંબઈ અથવા દેશના અન્ય સ્થળોએ જાય છે, ત્યારે ટુકડીના કમાન્ડો હંમેશાં પાયલોટ વાહન અને તેને પાછળ અનુસરતા વાહનો સાથે હોય છે.

Z+ સુરક્ષા કવરમાં CRPFના લગભગ 55 થી 60 સશસ્ત્ર કમાન્ડો હોય છે. કવરમાં 10 PSO અને ઘરની દેખરેખ માટે 10 સુરક્ષા ગાર્ડ મળે છે, સાથે જ, બુલેટપ્રૂફ કાર, ત્રણ શિફ્ટમાં એસ્કોર્ટ્સ અને જો જરૂરી હોય તો વધારાના કર્મચારીઓનો સમાવેશ થાય છે. હાલમાં મુકેશ અંબાણીને Z પ્લસ સુરક્ષા છે, જેમાં તેઓ લગભગ 58 CRPF કમાન્ડો સામેલ છે. જો કે, અંબાણીએ જ આ તમામની રહેવાની, ખાવા-પીવાની વ્યવસ્થા જોવી પડે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.