આસામમાં સગર્ભા સ્ત્રીઓ હોસ્પિટલમાં નથી જઈ રહી, આ છે કારણ

આસામ સરકારે બાળ લગ્ન સામે કડક અભિયાન શરૂ કર્યું છે. આ કેસમાં અત્યાર સુધીમાં 2763 ધરપકડ કરવામાં આવી છે. જેમાં હોજાઈ જિલ્લામાંથી 216 ધરપકડ કરવામાં આવી છે. સુરતો પાસેથી પ્રાપ્ત માહિતી મુજબ, ધરપકડ કરાયેલા લોકોમાં એવા ઘણા લોકો છે જેઓ ઘરેથી ભાગી જઈને લગ્ન કરી લીધા હતા. હવે પતિની ધરપકડ બાદ તેમની પત્નીઓ એકલી પડી ગઈ છે. જયારે, ઘણી સ્ત્રીઓ એવી છે કે જે માતા બનવાની છે, પરંતુ ડરના કારણે તેઓ હોસ્પિટલ પણ નથી જતા.

રિપોર્ટ્સ અનુસાર, ડિલિવરીની તારીખ પર પણ હોસ્પિટલમાં જતી વખતે ગર્ભવતી મહિલાઓ નર્વસ થઈ જાય છે. તેમને ડર છે કે, હોસ્પિટલમાં તેમની ઉંમરની માહિતી લેવામાં આવશે અને ત્યારબાદ પોલીસ તેમના ઘરે પણ પહોંચી શકે છે. એવી ઘણી મહિલાઓ છે જેમણે આશા કાર્યકરોનો સંપર્ક કરવાનું પણ બંધ કરી દીધું છે. તે ઈચ્છતી નથી કે વહીવટીતંત્રને તેની ઉંમર વિશે જાણ થાય.

હાલત એ છે કે, લોકોનો મેડિકલ સિસ્ટમ પરથી વિશ્વાસ ઉઠી ગયો છે. તેમને લાગે છે કે જો તેમની માહિતી લીધા પછી પરિવાર પર દરોડા પાડવામાં આવશે અને પતિની ધરપકડ પણ થઈ શકે છે. ASHA કાર્યકર્તાઓનું એમ પણ કહેવું છે કે, પોલીસની કાર્યવાહી બાદ તેઓને સ્થાનિક લોકોના વિરોધનો સામનો કરવો પડી રહ્યો છે.

આશા કાર્યકરો ગર્ભાવસ્થા અને રસીકરણ માટેની વ્યવસ્થાઓનું ધ્યાન રાખે છે. નિષ્ણાતોનું કહેવું છે કે સરકારની આ કાર્યવાહીને કારણે રસીકરણને પણ અસર થશે અને ગ્રામીણ વિસ્તારોમાં મહિલાઓ અને નવજાત બાળકોને અસર થશે. આસામ પહેલાથી જ આ સમસ્યાઓ છે, જે વધી શકે છે.

અત્રે ઉલ્લેખનીય છે કે, આસામમાં CM હેમંત બિસ્વા સરમા સરકાર બાળલગ્ન સામે જોરદાર અભિયાન ચલાવી રહી છે. સરકારના આ પગલાનો મહિલાઓએ અનેક જગ્યાએ વિરોધ કર્યો જે પોલીસ સાથે ઘર્ષણમાં ફેરવાઈ ગયો. ધુબરીમાં તમરાહા પોલીસ સ્ટેશનની સામે એકઠી થયેલી મહિલાઓને વિખેરવા પોલીસે લાઠીચાર્જ પણ કર્યો હતો. મહિલાઓએ કહ્યું કે, તેમના પતિ કે પુત્રોને છોડી દેવા જોઈએ. અહીં તમને જણાવી દઈએ કે, CM હેમંત બિસ્વા સરમાએ શુક્રવારથી જ આ અભિયાનની જાહેરાત કરી હતી, જે 6 દિવસ સુધી ચાલશે.

અહીં તમને જાણ થાય કે, આસામમાં 4 હજારથી વધુ કેસ નોંધાયા છે. સાથે જ આ અભિયાનમાં પોલીસની યાદીમાં 8000 આરોપીઓ છે. પોલીસે 51 પાદરીઓ અને કાઝીઓની પણ ધરપકડ કરી છે જેઓ બાળ લગ્ન આચરવામાં સામેલ હતા. રાજ્ય સરકારે તાજેતરમાં નિર્ણય લીધો છે કે 14 વર્ષથી ઓછી ઉંમરની છોકરી સાથે લગ્ન કરનારાઓ પર POCSO એક્ટ હેઠળ ગુનો નોંધવામાં આવશે અને 14 થી 18 વર્ષની વયની છોકરી સાથે લગ્ન કરનારાઓ પર બાળ લગ્ન પ્રતિબંધ કાયદા 2006 હેઠળ કેસ નોંધવામાં આવશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.