રૂબીના બની રૂબી! મુસ્લિમ યુવતીએ મંદિરમાં હિન્દુ છોકરા સાથે લગ્ન કર્યા

'ના ઉમ્ર કી સીમા હો, ના જન્મ કા હો બંધન, જબ પ્યાર કરે કોઈ, તો દેખે કેવલ મન...' જી હા, આવી જ એક સત્ય ઘટના UPના બહરાઈચ જિલ્લામાં સામે આવી છે. જ્યાં પ્રેમના રિવાજો સામે બે ધર્મની દીવાલો તૂટી ગઈ અને રૂબીના બેગમ, રૂબી અવસ્થી બનીને મંદિરમાં પોતાના પ્રેમીના નામનું સિંદૂર ભરીને તેની જીવનસાથી બની ગઈ. આ મામલો બહરાઈચ જિલ્લાના કોતવાલી દેહાત વિસ્તારનો છે. જ્યાં શિવપુરા ગામની રહેવાસી રૂબીના બેગમ હવે રૂબી અવસ્થી બની ગઈ છે. હિંદુ રીતિ-રિવાજ મુજબ રૂબીનાએ તેના ગામના શેષ કુમાર અવસ્થી નામના પ્રેમી સાથે મંદિરમાં પોતાના સેંથામાં સિંદૂર ભરીને લગ્ન કર્યા છે.

અહીં તમને જણાવી દઈએ કે, બંનેના લગ્નથી છોકરા પક્ષના લોકો ખૂબ જ ખુશ છે. જ્યારે યુવતી પક્ષે નારાજ છે. જો કે, પોલીસની સુરક્ષામાં બંનેએ 6 જૂને મંદિરમાં લગ્ન કરી લીધા હતા. શેષ અને રૂબીનાએ પોલીસની સુરક્ષામાં લગ્ન કર્યા. ત્યાર પછી બંને મંદિરમાં ગયા અને પૂજા કરી. 15 દિવસ પહેલા બંને લગ્ન કરવા ગામથી ભાગી ગયા હતા. અહીં તમને જણાવી દઈએ કે, રૂબી અને શેષ બંને શિવપુરા ગામના રહેવાસી છે. બંનેની મુલાકાત લગભગ 2 વર્ષ પહેલા થઈ હતી. રૂબીની ઉંમર 18 વર્ષની છે અને તે બેચલરની વિદ્યાર્થીની છે. જ્યારે શેષ 21 વર્ષનો છે અને ખાનગી નોકરી કરે છે. લગભગ 15 દિવસ પહેલા બંને ગામથી ભાગીને લગ્ન કરવા મુંબઈ ગયા હતા.

યુવતીના પરિવારજનોએ આ અંગે પોલીસમાં ફરિયાદ કરી હતી. તે લોકોએ શેષ વિરુદ્ધ તેમની પુત્રીનું અપહરણ કરવાનો કેસ નોંધ્યો હતો. પરિવારે કહ્યું કે, તેમની પુત્રી સગીર છે અને શેષ તેને લાલચ આપીને લઈ ગયો છે. ગામમાં તંગદિલીભર્યું વાતાવરણ જોઈને પોલીસે બંનેને મુંબઈથી ઝડપી લીધા હતા. ત્યાર પછી યુવતીને વન સ્ટોપ સેન્ટરમાં મોકલવામાં આવી હતી. છોકરાને પોલીસ કસ્ટડીમાં રાખવામાં આવ્યો હતો. રૂબીના કહે છે કે તે આગળની આખી જિંદગી શેષની સાથે હિન્દુ બનીને જ રહેશે.

3 જૂને બંનેને કોર્ટમાં રજૂ કરવામાં આવ્યા હતા. ત્યાં યુવતીના 164 હેઠળ નિવેદન લેવામાં આવ્યા હતા. સાથે જ છોકરાનું નિવેદન પણ લેવામાં આવ્યું હતું, જેમાં બંનેનું અફેર હોવાનું બહાર આવ્યું હતું. બંનેએ કોર્ટમાં કહ્યું હતું કે, તેઓ લગ્ન કરવા માગે છે. જ્યારે, છોકરીએ તેની માર્કશીટ પણ બતાવી, જે સાબિત કરે છે કે તે પુખ્ત છે. ત્યાર પછી, કોર્ટે બંનેને પોતાની મરજીથી લગ્ન કરવાની મંજૂરી આપી હતી. 6 જૂને વકીલ દિનેશ જયસ્વાલે રૂબીનાને હિંદુ બનવા માટે કાગળો તૈયાર કરાવ્યા હતા. ત્યાર પછી બંનેએ પોલીસ પ્રોટેક્શનમાં લગ્ન કર્યા હતા. રૂબીનામાંથી રૂબી અવસ્થી બનેલી મુસ્લિમ છોકરીના સસરા કન્હૈયા લાલ અવસ્થી કહે છે કે 'અમને ધર્મથી કોઈ ફરક નથી પડતો, છોકરીની કોઈ જાતિ હોતી નથી, જે છોકરી રૂબીનામાંથી રૂબી અવસ્થી બની હતી તે હવે અમારી વહુ છે.'

બંનેના લગ્ન પછી છોકરાના પિતાનું કહેવું છે કે, 'તેઓ આ લગ્નથી ખૂબ જ ખુશ છે. તેના પરિવારે રૂબીને દિલથી અપનાવી લીધી છે. તે કયા ધર્મની છે તેનાથી તેમને કોઈ ફરક પડતો નથી. અમારા માટે તે હવે અમારા ઘરની વહુ છે. મારા આશીર્વાદ બંને સાથે છે. બંને હંમેશા સાથે રહે, ખુશ રહે.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.