ઉત્તર પ્રદેશના કરોડો વાલીઓ માટે સારા સમાચાર છે. કારણ કે, રાજ્યની CM યોગી સરકારે કોરોના સમયગાળા દરમિયાન શાળાઓ દ્વારા લેવામાં આવેલી 15 ટકા ફી રિફંડ અથવા એડજસ્ટ કરવાની સૂચના આપી છે. આ માટે તમામ જિલ્લાના DM અને જિલ્લા શાળા નિરીક્ષકોને વિશેષ સચિવ દ્વારા આદેશ પહોંચાડી દેવામાં આવ્યા છે. આદેશ અનુસાર, તમામ બોર્ડની શાળાઓએ સત્ર 2020-21માં લેવામાં આવેલી ફીના 15 ટકા રિફંડ કરવા પડશે અથવા તેને આગળની ફીમાં એડજસ્ટ કરવી પડશે.
આદેશ અનુસાર, જે વિદ્યાર્થીઓએ શાળા છોડી દીધી છે તેઓને 15% ફી પરત કરવાની રહેશે. સાથે જ શાળામાં અભ્યાસ કરતા વિદ્યાર્થીઓની ફી એડજસ્ટ કરવાની રહેશે. હકીકતમાં, અલ્હાબાદ હાઈકોર્ટમાં કોરોના સમયગાળા દરમિયાન લેવામાં આવતી ફીને લઈને એક અરજી દાખલ કરવામાં આવી હતી. જેના પર 6 જાન્યુઆરી 2023ના રોજ કોર્ટે સરકારને 15 ટકા ફી પરત કરવાનો નિર્દેશ આપ્યો હતો.
હાઈકોર્ટના નિર્ણયનું પાલન કરીને તમામ જિલ્લાના જિલ્લા મેજીસ્ટ્રેટને આદેશ મોકલી આપવામાં આવ્યા છે. આ સાથે એવું પણ કહેવામાં આવ્યું છે કે, ફી એડજસ્ટ કરવામાં કે રિફંડ કરવામાં આનાકાની કરનાર સ્કૂલ મેનેજમેન્ટ સામે વાલીઓની ફરિયાદ પર કડક કાર્યવાહી કરવામાં આવશે.
ખરેખર, 2020-21માં, કોરોનાને કારણે, લોકડાઉન લાગુ કરવામાં આવી રહ્યું હતું. આ દરમિયાન તમામ શાળાઓ બંધ હતી અને માત્ર ઓનલાઈન અભ્યાસ ચાલુ હતો. પરંતુ તેમ છતાં શાળાઓ સંપૂર્ણ ફી વસુલતી હતી. જેની સામે વાલીઓએ હાઈકોર્ટમાં અરજી કરી હતી. પિટિશન દાખલ કરીને, વાલીઓએ માંગ કરી હતી કે કોવિડ રોગચાળા દરમિયાન, અભ્યાસ ઓનલાઈન થયો છે, તેથી તેમને શાળાઓમાં ઉપલબ્ધ સુવિધાઓ મળી નથી, તેથી તેઓ તેમની ફી ભરવા માટે જવાબદાર નથી.
આ અંગે સુનાવણી કરતા અલ્હાબાદ હાઈકોર્ટના મુખ્ય ન્યાયાધીશની અધ્યક્ષતાવાળી બેંચે શાળાની ફી માફ કરવાનો આદેશ આપ્યો હતો. હાઈકોર્ટે સ્પષ્ટ કર્યું હતું કે જ્યારે 2020-21માં સુવિધાઓ પૂરી પાડવામાં આવી ન હતી, તો 2019-20 સ્તરની ફી વસૂલી શકાય નહીં. હાઈકોર્ટે 2020-21માં જમા થયેલી ફીના 15 ટકા માફ કરવાનો આદેશ આપ્યો છે. આ આદેશ રાજ્યની તમામ શાળાઓને લાગુ પડશે. 2020-21માં જે ફી લેવામાં આવી હશે તેના 15 ટકા માફ કરવામાં આવશે.
15.jpg)
