ભગવો પહેરીને સાંપ લઇને ફરતી ગેંગથી સાવધ રહેજો, ટ્રાફિકસિગ્નલ પર પણ લૂંટી શકે

હરિયાણાના ગુરુગ્રામમાં સાધુનો વેશ બનાવીને લોકોને સાંપોથી ડરાવીને લૂંટવાના આરોપમાં 2 લૂંટારાઓની ધરપકડ કરવામાં આવી છે. પોલીસે સોમવારે આ જાણકારી આપી છે. પોલીસે જણાવ્યું કે, બંને વ્યક્તિઓ ટ્રાફિક સિગ્નલ પર કાર કે ઓટો રિક્ષામાં સવાર ઘણા લોકો પર સાંપ છોડીને તેમને લૂંટ્યા છે. પોલીસે તેમના કબ્જામાંથી બે સાંપ જપ્ત કરીને વન્ય જીવ વિભાગને સોંપી દીધા છે. પોલીસે જણાવ્યું કે, 22 વર્ષીય રોહિત નાથ અને 26 વર્ષીય શાકિબ નાથને શનિવારે શહેરની એક કોર્ટમાં રજૂ કરવામાં આવ્યા હતા. જેણે તેમને ન્યાયિક કસ્ટડીમાં મોકલી દીધા છે.

આ મામલો ત્યારે સામે આવ્યો, જ્યારે 36 વર્ષની સાદિયા વાણીએ સેક્ટર-53 પોલીસ સ્ટેશનમાં ફરિયાદ આપીને આરોપ લગાવ્યો કે સાધુના વેશમાં આવેલા બે લોકોએ તેના પર સાંપ છોડી દીધો અને તેની પાસેથી 2,000 રૂપિયા લૂંટી લીધા. તેની ફરિયાદ મુજબ ઘટના શુક્રવારે સવારે લગભગ સાડા દસ વાગ્યે ત્યારે થઈ જ્યારે તે ઓટો રિક્ષામાં ક્યાંક જઇ રહી હતી. સેક્ટર-53 પોલીસ સ્ટેશનના પ્રભારી રાજેન્દ્ર સિંહે જણાવ્યું કે, શંકાસ્પદ દિલ્હીથી ગુરુગ્રામ આવતા હતા અને શહેરના અલગ-અલગ સ્થળો પર મુસાફરોને સાંપ દેખાડીને લૂંટ્યા બાદ જતા રહેતા હતા.

આ એક ગેંગ છે જે દિલ્હીના ગુડગાંવના લોકોને સંપ દેખાડીને લૂંટી રહી છે. આ લોકો જાણીજોઇને ભગવા વસ્ત્ર પહેરે છે, જેથી લોકો આસ્થાના કારણે તેમની સાથે વાત કરી લે અને તેઓ પોતાની વાતમાં આવી જાય. બાઇક, ઓટો, કાર અહી સુધી કે બસથી ટ્રાવેલ કરી રહેલા લોકો પણ તેમની જાળમાં ફસાઈ શકે છે. આ લોકો પહલા કેટલાક પૈસા માગે છે. લોકોને લાગે છે કે ભગવા વસ્ત્રમાં કોઈ બાબા છે, જેવા જ તેમને પૈસા આપવા માટે પોતાનું પર્સ કાઢે છે આ લોકો તેમના ઉપર સાંપ છોડી દે છે. સાંપને જોઈને લોકો ડરી જાય છે અને એ જ ડરનો ફાયદો ઉઠાવીને પૈસા, કિંમતી સામાન ઉઠાવી લે છે.

તેઓ લોકોને લૂંટવા માટે રોજ રસ્તા પર આ પ્રકારે સાંપ લઈને નીકળી જાય છે. આ ગેંગના કેટલાક લોકોની ધરપકડ એપ્રિલ મહિનામાં પણ દિલ્હીના લોધી રોડ પર થઈ હતી. આ લોકો પણ ભગવા વસ્ત્ર પહેરીને લોકો પાસે પહેલા ભીખ માગતા હતા અને પછી જેવા જ તેમને પૈસા આપવા માટે આગળ વધતા હતા, તેમના પર તેઓ સંપ છોડીને ડરાવતા હતા. ત્યારબાદ તેનો ફાયદો ઉઠાવીને ઘરેણાં, પૈસા કે બીજો કિંમતી સામાન લૂંટી લેતા હતા. આ ગેંગના 4 લોકોની ધરપકડ થઈ હતી. પોલીસે જણાવ્યું હતું કે તેઓ વેશ બદલવામાં માહિર છે અને તેમની ગેંગના ઘણા અન્ય લોકો પણ દિલ્હી અને NCRના રસ્તા પર એવી જ રીતે લોકોને લૂંટી રહ્યા છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.