યમુના એક્સપ્રેસ-વે પર લૂંટારાઓનો આટલો આતંક,પોલીસ તેમને પકડવા ઝાડ પર છુપાઈ રહી છે

ઉત્તર પ્રદેશના યમુના એક્સપ્રેસ વે પર લૂંટની ઘટનાઓએ પોલીસ પ્રશાસનની ચિંતા વધારી દીધી છે. આ પછી, આ પ્રકારની પરિસ્થિતિનો સામનો કરવા માટે મોટા પાયે મોટો નિર્ણય લેવામાં આવ્યો છે. એક્સપ્રેસ વે પર ચાંપતો બંદોબસ્ત વધારી દેવામાં આવ્યો છે. સતર્કતા એવી છે કે, લૂંટારાઓને ગમે તે ભોગે પકડવાના જ છે. આ માટે પોલીસે નવી યુક્તિ અપનાવી છે. પોલીસ હવે વૃક્ષો પર બેસીને ગુનેગારો પર નજર રાખી રહી છે. એક્સપ્રેસ વે પર દરેક 2 Km પર સાદા યુનિફોર્મમાં પોલીસ તૈનાત કરવામાં આવી છે. આ ઉપરાંત સાદા યુનિફોર્મમાં પોલીસકર્મીઓ ખેતરોમાં પણ તૈનાત કરવામાં આવ્યા છે. આ વ્યૂહરચના લૂંટારાઓ લૂંટ કર્યા પછી ભાગી જાય તો તેમને પકડવા માટે ઘડવામાં આવી છે. યમુના એક્સપ્રેસ વે ઓથોરિટીએ મથુરા પોલીસની આ કાર્યવાહી પર ખુશી વ્યક્ત કરી છે. એક્સપ્રેસ વે પર સલામત અને સુખદ મુસાફરી માટે વહીવટી સ્તરે વ્યવસ્થા કરવામાં આવી રહી છે.

યમુના એક્સપ્રેસ વે પર મુસાફરોની લૂંટના બે કિસ્સાઓને પગલે મથુરા પોલીસે વ્યસ્ત માર્ગ પર સતર્કતા વધારી છે. 2 જૂને ફિરોઝાબાદથી દિલ્હી જઈ રહેલા કરિયાણાના વેપારીને તેના પરિવારના ત્રણ સભ્યો સાથે લૂંટવામાં આવ્યો હતો. બંને ઘટનાઓ મોડી સાંજે મથુરા જિલ્લામાંથી પસાર થતા એક્સપ્રેસ વેના ભાગ પર બની હતી. બદમાશોએ વાહનોને રોકવા માટે પહેલા પથ્થરમારો કર્યો અને પછી આ ઘટનાને અંજામ આપ્યો. વધુ એક કિસ્સો સામે આવ્યો છે. દિલ્હીમાં બદમાશોએ મહિલાની કાર પર પથ્થરમારો કર્યો હતો. જેના કારણે તેને ઈજા થઈ હતી. મથુરા જિલ્લામાં બે લૂંટ અને એક નિષ્ફળ પ્રયાસ બાદ સતર્કતા વધારી દેવામાં આવી છે. મથુરા પોલીસ વતી, વાહનચાલકોની સુરક્ષા માટે એક્સપ્રેસ વે પર 100થી વધુ પોલીસકર્મીઓ તૈનાત કરવામાં આવ્યા છે.

સાદા યુનિફોર્મમાં પોલીસકર્મીઓ એક્સપ્રેસ વે પર તૈનાત કરવામાં આવ્યા છે. યમુના એક્સપ્રેસવે ઈન્ડસ્ટ્રીયલ ડેવલપમેન્ટ ઓથોરિટીના એક અધિકારીએ કહ્યું કે, મથુરા પોલીસની કાર્યવાહી શાનદાર છે. તેમણે કહ્યું કે, છેલ્લા કેટલાક દિવસોમાં પોલીસ પેટ્રોલિંગમાં નોંધપાત્ર વધારો થયો છે. પોલીસકર્મીઓ દર 2 કિલોમીટરના અંતરે જોઈ શકાય છે. બંદૂકો અને દૂરબીનથી સજ્જ સિવિલ ડ્રેસમાં પોલીસ વૃક્ષો પર તૈનાત કરવામાં આવી છે. એક્સપ્રેસ વેને અડીને આવેલા ખેતરોમાં પણ સિવિલ ડ્રેસમાં પોલીસ તૈનાત કરવામાં આવી છે. પોલીસને સામાન્ય નાગરિક તરીકે બતાવવા માટે ખાટલાની વ્યવસ્થા પણ ગોઠવવામાં આવી છે. આ ઉપરાંત વાહનોનું ચેકિંગ નિયમિત કરવામાં આવ્યું છે. અધિકારીએ કહ્યું કે મથુરા પોલીસની આ કાર્યવાહી અભૂતપૂર્વ છે.

દિલ્હીના બિઝનેસમેને મોટો ખુલાસો કર્યો છે. વાસ્તવમાં, દિલ્હીના વેપારી સંતોષ અરોરા, જેઓ રવિવારે મથુરાથી બાંકે બિહારી મંદિરના દર્શન કરીને પોતાના બે મિત્રો સાથે પરત ફરી રહ્યા હતા, તેમણે પોલીસ કાર્યવાહીનો પોતાનો અનુભવ શેર કર્યો. તેણે કહ્યું કે શનિવારે સાંજે લઘુશંકા માટે મેં મારી કાર એક્સપ્રેસ વે પર રોકી હતી. આ દરમિયાન સાદા કપડામાં એક વ્યક્તિને બંદૂક સાથે ઝાડ પર બેઠેલા જોઈને હું ડરી ગયો હતો. થોડી જ વારમાં યુનિફોર્મમાં બે વધુ માણસો સ્થળ પર પહોંચ્યા. અમને વચ્ચે ન રોકાવા ચેતવણી આપી. પોલીસકર્મીઓએ અમને તરત જ નીકળી જવા કહ્યું.

SP શૈલેષ કુમાર પાંડેએ જણાવ્યું કે, પીડિતો પાસેથી મળેલી માહિતીના આધારે લૂંટમાં સામેલ લોકોના સ્કેચ તૈયાર કરવામાં આવ્યા છે. આરોપીની ઉંમર 20 થી 35 વર્ષની વચ્ચે હોવાનું કહેવાય છે. સ્કેચના આધારે એક્સપ્રેસ વે પર લાગેલા CCTV કેમેરાની તપાસ કરવામાં આવી રહી છે. તેને પકડવા માટે અનેક ટીમો પ્રયાસ કરી રહી છે. 165.5 Km લાંબો અને છ લેન પહોળો યમુના એક્સપ્રેસવે નોઈડાને આગ્રા સાથે જોડે છે. મથુરા જિલ્લામાં એક્સપ્રેસ વેની લંબાઈ લગભગ 65 Km છે. તે જિલ્લાના સાત પોલીસ સ્ટેશનના કાર્યક્ષેત્રમાંથી પસાર થાય છે.

યમુના એક્સપ્રેસ વે પર લૂંટ માટે રોડવેઝની બસોને પણ નિશાન બનાવવામાં આવી હોવાની માહિતી સામે આવી છે. જેવર નજીકના રબુપુરા પોલીસ સ્ટેશન વિસ્તારમાં ઇટાવાથી દિલ્હી જતી રોડવેઝ બસને લૂંટવાનો પ્રયાસ કરવામાં આવ્યો હતો. બદમાશોએ બસ પર પથ્થરમારો કરી કાચ તોડી નાખ્યા હતા. બસ ચાલકે હિંમત બતાવી વાહન રોક્યું ન હતું. આ બસ સીધી નોઈડા ડેપો પર જઈને રોકાઈ હતી. જેના કારણે બદમાશોની યોજના પૂર્ણ થઈ શકી ન હતી. આ ઘટનાઓ પછી એક્સપ્રેસ વે પર પોલીસની સતર્કતા વધારી દેવામાં આવી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.