સુપ્રીમ કોર્ટની મહિલા વકીલની હત્યા, પતિની ધરપકડ, 4.5 કરોડ...

નોઈડાના સેક્ટર-30માં રહેતી મહિલા વકીલની હત્યાના કેસમાં પોલીસે આરોપી પતિ નીતિન સિંહાની ધરપકડ કરી છે. આરોપી તેના ઘર D-40ના સ્ટોર રૂમમાં છુપાયેલો હતો. આ સ્ટોર રૂમ ઘરના પહેલા માળે બનેલો છે. આ એ જ ઘર છે જેમાં એડવોકેટ મહિલાની લાશ બાથરૂમમાંથી મળી આવી હતી. પ્રાથમિક તપાસમાં સામે આવ્યું છે કે, નિતિને મિલકતના વિવાદમાં પત્ની રેણુ સિંહાની હત્યા કરી હતી. મૃતક મહિલાનો પતિ IIS (ભારતીય માહિતી સેવાઓ)માં નોકરી કરતો હતો.

રેણુ સિંહા તેના પતિ સાથે સેક્ટર-30ની D-40 કોઠીમાં રહેતી હતી. તેનો ભાઈ તેને બે દિવસથી સતત ફોન કરી રહ્યો હતો. જ્યારે તેને કોઈ જવાબ ન મળ્યો તો તેણે પોલીસમાં ફરિયાદ કરી. પોલીસ રવિવારે બપોરે D-40 પહોંચી હતી. પોલીસ ત્યાંનો દરવાજો તોડી અંદર ગઈ. મહિલા એડવોકેટની લાશ બાથરૂમમાં પડી હતી. મૃતકના ભાઈએ સેક્ટર-20 પોલીસ સ્ટેશનમાં તેના બનેવી પર હત્યાની આશંકા સાથે ફરિયાદ નોંધાવી હતી. ઘટના પછી મૃતકનો પતિ ફરાર થઈ ગયો હતો. આ દરમિયાન DCP હરીશ ચંદર, એડિશનલ DCP શક્તિ મોહન અવસ્થી અને ACP રજનીશ વર્મા અને અન્ય અધિકારીઓ સ્થળ પર હાજર હતા. આ કેસનો પર્દાફાશ કરવા માટે પોલીસની ત્રણ ટીમો બનાવવામાં આવી હતી.

રેણુ સિંહાના હત્યારા પતિનો મોબાઈલ ફોન ચાલુ હતો, પરંતુ તે જવાબ આપતો ન હતો. પોલીસે મોબાઈલનું લોકેશન ટ્રેક કર્યું ત્યારે તે D-40 આસપાસનો હોવાનું દર્શાવાયું હતું. પોલીસને શંકા હતી કે, નીતિન અહીં ક્યાંક છુપાયો છે. રાત્રે 3 વાગ્યાની આસપાસ પોલીસ પહેલા માળે આવેલા સ્ટોર રૂમમાં પહોંચી હતી. તેની બંને બાજુએ દરવાજા હતા. એક ગેટ બહારથી અને બીજો ગેટ અંદરથી બંધ હતો. પોલીસે સૌપ્રથમ જ્યારે તાળું તોડ્યું ત્યારે તે પણ અંદરથી બંધ હતું. તેને શંકા જતાં તેણે દરવાજો તોડ્યો અને અંદર નીતિન બેઠેલો જોવા મળ્યો.

પોલીસે જણાવ્યું કે, પોસ્ટમોર્ટમ રિપોર્ટ આવ્યા પછી જ મૃત્યુનું સાચું કારણ જાણી શકાશે. પ્રાથમિક તપાસમાં જાણવા મળ્યું છે કે, બે દિવસ પહેલા રેણુ અને નીતિન વચ્ચે પ્રોપર્ટી બાબતે ઝઘડો થયો હતો. વિવાદ એટલો વધી ગયો કે, તેણે રેણુ સાથે ઝપાઝપી કરી. આ પછી તેણે રેણુનું મોં ઓશીકા વડે દબાવ્યું. તેણે તેનું માથું દિવાલ પર અથડાવ્યું, જેના કારણે તેને માથા પર વાગ્યું. આ પછી તે તેને ખેંચીને બાથરૂમમાં લઈ ગયો અને ત્યાં જ બેસી રહ્યો.

આ ઘરના કારણે રેણુની હત્યા કરવામાં આવી હતી. ખરેખર, નીતિન ઘર વેચવા માંગતો હતો. તેણે તેની કિંમત અને ગ્રાહકો બંને નક્કી કરી લીધા હતા. હત્યાના એક દિવસ પહેલા ખરીદદારો ઘર જોવા પણ આવ્યા હતા. આ સોદો 4.5 કરોડ રૂપિયામાં નક્કી થયો હતો, પરંતુ રેણુ તેની તરફેણમાં ન હતી. જેના કારણે બંને વચ્ચે અવારનવાર ઝઘડો થતો હતો. તપાસમાં જાણવા મળ્યું કે બાથરૂમ પાસે સિગારેટની રાખ પણ મળી આવી હતી. જેને તે સાફ ન કરી શક્યો. નીતિનને સિગારેટ પીવાની લત છે. પોલીસે તેની ધરપકડ કરી ત્યારે પણ તે સિગારેટ માંગતો હતો. એવું કહેવામાં આવ્યું હતું કે, હત્યા કર્યા પછી, ગુસ્સાથી લાલ થયેલા નીતિને સિગારેટ સળગાવી અને સિગારેટની રાખ બાથરૂમ પાસે જ ફેંકી દીધી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.