ચેકિંગથી બચવા યાત્રી શૌચાલયમાં ઘુસ્યો,ધૂમ્રપાન કરી સિગારેટ કચરામાં ફેંકી, પછી...

બુધવારે આંધ્રપ્રદેશના તિરુપતિ-સિકંદરાબાદ વચ્ચે દોડતી વંદે ભારત એક્સપ્રેસ ટ્રેનમાં અચાનક ધુમાડો નીકળ્યો હતો. આ ઘટના બાદ ટ્રેનના ડ્રાઈવરે તેને આંધ્રપ્રદેશના મનુબોલુ ગામમાં રોકી હતી. આ ઘટના ત્યારે બની જ્યારે ટ્રેન નેલ્લોર જિલ્લામાંથી પસાર થઈ રહી હતી અને લોકો પાયલટે સ્ટાફને ધુમાડા અને આગ વિશે ચેતવણી આપી હતી. આ બાબતને ગંભીરતાથી લઈને ટ્રેનને રોકી દેવામાં આવી હતી. ત્યાર પછી તપાસ કરતા રેલવે સ્ટાફને એક કોચના ટોયલેટમાંથી આ ધુમાડો નીકળતો દેખાયો હતો.

મીડિયા રિપોર્ટ્સ અનુસાર, રેલવે અધિકારીઓએ જણાવ્યું હતું કે, તિરુપતિ-સિકંદરાબાદ વંદે ભારત એક્સપ્રેસ ટ્રેનમાં એક ટિકિટ વગરનો યાત્રી મુસાફરી કરી રહ્યો હતો. આ મુસાફર ટિકિટ ચેકરના ચેકિંગથી બચાવવા માટે ટ્રેનના C-13 કોચમાં પોતાની જાતને બંધ કરી દીધી હતી. કહેવામાં આવે છે કે, આ મુસાફર તિરુપતિથી અનધિકૃત રીતે ટ્રેનમાં ચઢ્યો હતો. ટિકિટ વિનાના મુસાફરે શૌચાલયમાં રહેલી પ્લાસ્ટિકની નકામી સામગ્રી પર સળગતી સિગારેટ ફેંકી દીધી હતી. જેના કારણે તેમાં આગ લાગી હતી.

આ પછી, ટોઇલેટમાંથી ધુમાડો નીકળવાનું શરુ થઇ ગયું હતું, જે લોકો પાઇલટની નજરમાં આવી ગયું. આ વાતને ગંભીરતાથી લઈને લોકો પાયલટે હાજર સ્ટાફને જાણ કરી. આ મામલે કોઈ જાનહાનિ વગેરે થવા અંગે કોઈ માહિતી નથી. આ મામલામાં મુસાફરની નેલ્લોરમાં અટકાયત કરવામાં આવી છે અને તેની સામે કાર્યવાહી કરવામાં આવી રહી છે.

અહીં તમને જણાવી દઈએ કે, દક્ષિણ મધ્ય રેલવે હેઠળ ચાલતી તિરુપતિ-સિકંદરાબાદ વંદે ભારત એક્સપ્રેસ ટ્રેનનું ઉદ્ઘાટન 8 એપ્રિલ 2023ના રોજ PM નરેન્દ્ર મોદીએ લીલી ઝંડી બતાવીને કર્યું હતું. સિકંદરાબાદ-તિરુપતિ વંદે ભારત એક્સપ્રેસ એ બીજી વંદે ભારત ટ્રેન છે જે ત્રણ મહિનાથી ઓછા સમયમાં તેલંગાણાથી રજૂ કરવામાં આવી છે.

VIDEO | An unauthorised passenger's smoking activity inside a toilet on Tirupati-Secunderabad Vande Bharat Express triggered a false fire alarm on Wednesday evening, a railway official said. The incident happened in coach C 13 on Train No. 20702 after passing Gudur. Following the… pic.twitter.com/ORMdlVG5ya

— Press Trust of India (@PTI_News) August 9, 2023

તિરુપતિ-સિકંદરાબાદ વંદે ભારત એક્સપ્રેસ ટ્રેન સિકંદરાબાદથી સવારે 6.15 વાગ્યે ઉપડે છે. મુસાફરી દરમિયાન, આ ટ્રેન સવારે 7:29 વાગ્યે નાલગોંડા, સવારે 9:35 વાગ્યે ગુંટુર, 11:12 વાગ્યે ઓંગોલ, 12:29 વાગ્યે નેલ્લોર સ્ટેશને રોકાઈને પછી બપોરે 2:30 વાગ્યે તિરુપતિ પહોંચશે. આના પછી, તે જ વંદે ભારત ટ્રેન બપોરે 3:15 વાગ્યે તિરુપતિથી શરુ થાય છે અને રાત્રે 11:30 વાગ્યે સિકંદરાબાદ પહોંચે છે.