ટામેટા 200 રૂપિયા કિલોને પાર, ભાવ સાંભળી લોકો થયા લાલ!

પાછલા બે મહિનાથી ટામેટાના ભાવે આખા દેશમાં લોકોને લાલ કર્યા છે. હજુ પણ ટામેટાની કિંમતમાં ઘટાડાના કોઈ એંધાણ જોવા મળી રહ્યા નથી. ટામેટાની વધતી કિંમતોએ લોકોનું બજેટ ખોરવી નાખ્યું છે. ભાવ ઓછો થવાની જગ્યાએ દિવસેને દિવસે વધી રહ્યો છે. રિટેલ માર્કેટમાં ટામેટાની કિંમત 200થી 250 રૂપિયા પ્રતિ કિલો સુધી તો દિલ્હીના જથ્થાબંધ બજારમાં 5000 રૂપિયા પ્રતિ કેરેટ ભાવ થઇ ગયો છે.

પૂર અને વરસાદને કારણે મંડીઓમાં ટામેટાની સપ્લાઈમાં આવી રહેલી મુશ્કેલીઓને કારણે કિંમતોમાં તોતિંગ વધારો થઈ રહ્યો છે. ઓછા જથ્થામાં ટામેટા પહોંચવાને કારણે જથ્થાબંધ બજારની સાથે સાથે છૂટક બજારોમાં ટામેટાની કિંમતમાં સતત વધારો થઇ રહ્યો છે. અઠવાડિયા પહેલા ટામેટા 100 થી 150 રૂપિયા પ્રતિ કિલોએ વેચાઇ રહ્યા હતા. જે હવે 200 રૂપિયા સુધી પહોંચી ચૂક્યા છે. દિલ્હી-NCR ઉપરાંત તમિલનાડુમાં ટામેટાનો જથ્થાબંધ ભાવ 200 રૂપિયા કિલોને પાર પહોંચી ચૂક્યો છે.

ટામેટાની કિંમત ઓલ-ટાઈમ હાઈ

ઉત્તરાખંડના જથ્થાબંધ માર્કેટમાં ટામેટાની કિંમત 4100 રૂપિયા પ્રતિ કેરેટ(25 કિલો) પર પહોંચી ગઇ છે. આ કિંમતમાં ટ્રાન્સપોર્ટેશન, પ્રોફિટ માર્જિન વગેરે જોડી લેવામાં આવે તો દિલ્હીના બજારમાં તેનો ભાવ 5000 રૂપિયા પ્રતિ કેરેટ પહોંચી ગયો છે. આ સીઝનમાં ટામેટાની કિંમત 1200-1400 રૂપિયા પ્રતિ કેરેટ રહે છે, જે વધીને 5000 રૂપિયા પર પહોંચી ગઈ છે. ટામેટાએ પાછલા બધા રેકોર્ડ તોડી લોકોના ખિસ્સા પર બોજો વધારી દીધો છે.

વેપારીઓનું કહેવું છે કે, ટામેટાની કિંમત ઓછી થશે એવા કોઈ એંધાણ જોવા મળી રહ્યા નથી. આવતા અઠવાડિયા સુધીમાં ટામેટાની કિંમત 250 રૂપિયાને પાર જઇ શકે છે. કોયમ્બેડુ હોલસેલ માર્કેટ એસોસિએશનના સચિવ પી સુકુમારન અનુસાર, એવું પહેલીવાર થયું છે કે જ્યારે ટામેટાની કિંમત 200 રૂપિયાને પાર થઇ છે. વેપારીઓને આશા હતી કે ટામેટાની કિંમત 20 જુલાઈ પછી ઓછી થશે પણ વરસાદ અને પૂરને લીધે પાક ખરાબ થઇ ગયો છે.

વેપારીઓના મતે ટામેટાની કિંમતમાં ઘટાડો થવામાં હજુ બે-ત્રણ મહિનાનો સમય લાગી શકે છે. NCCF શહેરોમાં ઓછી કિંમતે ટામેટા વેચી રહ્યા છે પણ તેની કિંમતો પર કોઈ અસર જોવા મળી રહી નથી. ટામેટાની સાથે અન્ય શાકભાજીઓની કિંમતો પણ વધી રહી છે. કોઈપણ શાકભાજી 60-70 રૂપિયે કિલોથી નીચે વેચાઇ રહ્યા નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.