બીજી ઓક્ટોબર એટલે રાષ્ટ્રપિતા મહાત્મા ગાંધી જયંતિ હતી. આ વખતની ગાંધી જયંતિએ બે બાબત ઉડીને આંખે વળગી હતી. એક તરફ વડાપ્રધાન મોદીના હાકલ પર ગાંધી જયંતિએ ભાજપ દ્વારા ગાંધી પ્રેમને ઉદ્દઘોષિત કરતાં કાર્યક્રમો જોવા મળ્યા હતા તો બીજી તરફ કોંગ્રેસનો બીબાઢાળ અને માત્ર દેખાડા જેવા કાર્યક્રમો જોવા મળ્યા. કોંગ્રેસના કાર્યક્રમોને લઈ અનેક પ્રશ્ન પણ લોકો પૂછી રહ્યા છે.
ગુજરાતમાં કોંગ્રેસે ગાંધી જયંતિએ સરકાર સામે વિરોધ પ્રદર્શનો કર્યા હતા. ગાંધીજી પ્રત્યે પોતાની લાગણી દેખાડવા માટે કોંગ્રેસીઓ પાસે ગાંધીજીની પ્રતિમાને સૂતરની આંટી સિવાયના અન્ય કોઈ કાર્યક્રમો જોવા મળતા નથી. દર વર્ષે ગાંધીજીના નામે ગાંધી ટોપી પહેરી કોંગ્રેસીઓ ફૂલીને ફાળકા જરુર થતા રહે છે પણ વાસ્તવિક રીતે કોંગ્રેસીઓ ગાંધીજીના સંસ્કારો, સિદ્વાંતો, નીતિઓ, તેમના કરેલા કાર્યોને આગળ ધપાવવાનો કોઈ કાર્યક્રમ કરતા હોય એવું પાછલા અનેક વર્ષોથી જોવા મળતા નથી.
આ વખતે કોંગ્રેસીઓ ગાંધી વિચારધારાને આગળ ધપાવવાના કાર્યક્રમને બદલે વિપરીત રીતે ગાંધી જયંતિએ શિક્ષણ નીતિને લઈ વિરોધ પ્રદર્શનો કર્યા હતા. આ બતાવે છે કે કોંગ્રેસ ગાંધીજીના દ્રષ્ટિકોણને હવે તિલાંજલિ આપી રહી છે અથવા તો ગાંધીજીના પ્રેરણારુપ કાર્યો પ્રત્યે આંખ આડા કાન કરી સમગ્ર ગાંધી વિચારધારાને જ કોરાણે મૂકી રહી છે. કેટલાક ગાંધીવાદીઓ પોતે અંદરખાને સ્વીકારે છે કે કોંગ્રેસમાંથી ગાંધી સંસ્કારો લૂપ્ત થઈ રહ્યા છે. એવું લાગે છે કે કોંગ્રેસીઓને ગાંધીજીના નામને વટાવી લેવું છે અને ગાંધીજીની વિચારધારાના પ્રચાર-પ્રસાર માટે કશું કરવું નથી. ગાંધી જયંતિએ વિરોધ પ્રદર્શનો કરવા કરતાં ગાંધીજીની વિચારધારાને અનુલક્ષીને ભાજપ જેવા કાર્યક્રમો આપવાની ફરજ કોંગ્રેસની હતી પણ કોંગ્રેસીઓ એ જ જરી પુરાણી માનસિક્તામાંથી બહાર આવી રહ્યા નથી.
બીજી તરફ ભાજપે ગાંધીજી પ્રત્યેના અહોભાવ અને લાગણી દર્શાવવા માટે અનેક કાર્યક્રમો આપ્યા હતા. જેની અસર હકીકતમાં જોવા પણ મળી હતી. પ્રથમ તો પીએમ મોદીના આહવાન પર ભાજપે બાપુને સ્વચ્છાંજલિ આપતા કાર્યક્રમો કર્યા. ભાજપ કાર્યકરો દ્વારા ગાંધીજીની તર્જ પર જ પરોઢના સમયે પ્રભાતફેરીનું આયોજન કરાયું. આ સાથે પ્રાથના સભાઓ સાથે ગાંધીજીની પ્રતિમાને સુતરની આંટી પહેરાવવામાં આવી હતી.
નોંધપાત્ર એ છે કે ગાંધી જયંતિએ ભાજપે ગાંધી સંસ્કારને આત્મસાત કર્યા હોય તેમ ગાંધીજીના ખાદી ગ્રામોદ્યોગને પ્રોત્સાહિત કરવા માટેના કાર્યક્રમો કર્યા. વિવિધ શહેરોમાં આવેલી ખાદીની દુકાનોમાંથી ખાદીના કપડાંની ખરીદી કરી. એક રિપોર્ટ મુજબ માત્ર દાહોદ જિલ્લામાં જ 1.45 લાખની ખાદીનું વેચાણ થયું. આવી રીતે ગાંધી જયંતિએ ભાજપે ગાંધીજીના ખાદીના વિચારના પ્રચાર-પ્રસાર માટે ઘણું-ઘણું કર્યું છે. ભાજપ ગાંધીજીના સંસ્કારોને પ્રોત્સાહિત કરીને “પીડ પરાઈ જાણે”ની ભાવનાની સંભાળ રાખી રહ્યું હોવાનું પ્રતિત થઈ રહ્યું છે.
15.jpg)
