Kia ઈન્ડિયાના નેશનલ હેડે કહ્યુ-2025 પહેલા ઈલેક્ટ્રિક કાર ન ખરીદતા, આપ્યું આ કારણ

દેશમાં પાછલા ઘણાં વર્ષોથી ઈલેક્ટ્રિક કારોને લઇ લોકોની વચ્ચે ક્રેઝ વધી રહ્યો છે. ઘરેલૂ વાહન નિર્માતાઓ ઉપરાંત વિદેશી કંપનીઓ પણ ઝડપથી પોતાના ઈલેક્ટ્રિક વાહનોના પોર્ટફોલિયોને વધારવામાં લાગ્યા છે. ઈલેક્ટ્રિક કારોની રેસમાં ટાટા મોટર્સ, મહિન્દ્રા એન્ડ મહિન્દ્રા, હ્યુંડૈ, એમજી મોટર્સ અને કિઆ ઈન્ડિયા જેવી કંપનીઓ સામેલ છે. જોકે, કિઆ ઈન્ડિયાના નેશનલ સેલ્સ એન્ડ માર્કેટિંગ હેડ હરદીપ સિંહ બરારનું માનવું છે કે, 2025 પછી ઈલેક્ટ્રિક કાર ખરીદવી યોગ્ય બને છે.

પાછલા દિવસોમાં કિઆ ઈન્ડિયાએ માર્કેટમાં પોતાની નવી સેલ્ટોસ ફેસલિફ્ટને રજૂ કરી હતી. આ SUVની સાથે જ કિઆ મોટર્સે ભારતીય માર્કેટમાં લગભગ 4 વર્ષ પહેલા એન્ટ્રી કરી હતી અને હવે આ કારને અપડેટ કરી માર્કેટમાં ઉતારવામાં આવી છે. આ અવસરે કિઆ ઈન્ડિયાના નેશનલ સેલ્સ એન્ડ માર્કેટિંગ હેડ હરદીપ સિંહ બરારે જણાવ્યું કે, હાલમાં ઈલેક્ટ્રિક વાહન ખરીદવા સમજદારીભર્યું કામ નથી.

જ્યારે તેમને પૂછવામાં આવ્યું કે, ઈલેક્ટ્રિક વ્હીકલ સેગમેન્ટમાં તેઓ કઈ રીતની મુશ્કેલીઓ જુએ છે. તેના જવાબમાં બરાર કહે છે, હાલની સ્થિતિને જોતા EV સેગમેન્ટમાં 3-4 મોટા પડકારો છે.

આ છે 4 મોટા પડકારો

1. ઈલેક્ટ્રિક ગાડીઓ ઓછી છે તો લોકો પાસે પસંદગીના વિકલ્પો પણ ઓછા છે
2. પેટ્રોલ-ડીઝલ કારોની સરખામણીમાં ઈલેક્ટ્રિક કારો ખાસ્સી મોંઘી છે. જેની કિંમત લગભગ 70થી 80 ટકા વધારે છે.
3. ચાર્જિંગ ઈન્ફ્રાસ્ટ્રક્ચરની અછત પણ એક મોટું કારણ છે.
4. અમુક EVની રેન્જ હજુ ઓછી છે, જોકે ધીમે ધીમે તે સારી થઇ રહી છે. આશા છે કે 2025 સુધીમાં આ સ્થિતિઓને લઇ સુધારો જોવા મળશે.

હરદીપ સિંહનું કહેવું છે કે, 2025 સુધીમાં માર્કેટમાં એવા ઈલેક્ટ્રિક વાહનો આવી જશે જેની રેન્જ વધારે રહેશે. સાથે જ ચાર્જિગ ઈન્ફ્રાસ્ટ્રક્ચર પણ સુધરી જશે. મારું માનવું છે કે 2025 પછીથી ઈલેક્ટ્રિક કારો ખરીદવી યોગ્ય રહેશે.

કિઆની માસ માર્કેટ કાર

કિઆ ઈન્ડિયા ભારતીય બજારમાં માસ માર્કેટ ઈલેક્ટ્રિક કાર લાવવાની તૈયારીમાં છે. જોકે આ સેગમેન્ટમાં કંપનીના પોર્ટફોલિયોમાં પહેલાથી જ Kia EV6 ઈલેક્ટ્રિક SUV મોજૂદ છે. આ એક પ્રીમિયમ કાર છે. જેની કિંમત 60.95 લાખ રૂપિયાથી લઇ 65.95 લાખ રૂપિયાની વચ્ચે છે. ડ્રાઈવિંગ રેન્જની વાત કરીએ તો તેને લઇ કંપનીનો દાવો છે કે આ કાર સિંગલ ચાર્જમાં 708 કિમી સુધીનું અંતર કાપી શકે છે. જોકે, ઈલેક્ટ્રિક કાર ખાસ્સી મોંઘી છે અને સામાન્ય નાગરિકની પહોંથી ઘણી દૂર છે. એવામાં કંપની બજેટલક્ષી ઈલેક્ટ્રિક કાર લાવવાની યોજના બનાવી રહી છે. જે ઓછી કિંમતે સારી રેન્જ આપે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.