ODI વર્લ્ડ કપના 3 મહિના પહેલા કેપ્ટન પ્રેસ કોન્ફરન્સમાં રડી પડ્યો

બાંગ્લાદેશની ODI ટીમના કેપ્ટન તમિમ ઈકબાલે વર્લ્ડ કપના ત્રણ મહિના પહેલા જ ઈન્ટરનેશનલ ક્રિકેટમાંથી નિવૃત્તિની જાહેરાત કરીને સૌને ચોંકાવી દીધા હતા. એક દિવસ પહેલા બાંગ્લાદેશને ઘરઆંગણે અફઘાનિસ્તાન સામેની વનડે મેચમાં હારનો સામનો કરવો પડ્યો હતો.

બાંગ્લાદેશની ODI ટીમના કેપ્ટન તમીમ ઈકબાલે વર્લ્ડ કપના ત્રણ મહિના પહેલા આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. આ સાથે તેની 16 વર્ષની લાંબી કારકિર્દીનો અંત આવ્યો. તમિમે પ્રેસ કોન્ફરન્સમાં આ પ્રકારની માહિતી આપી હતી. પોતાના નિવૃત્તિના નિર્ણયની માહિતી આપતાં તમીમ ખૂબ જ ભાવુક થઈ ગયો હતો અને પ્રેસ કોન્ફરન્સમાં જ તેની આંખોમાંથી આંસુ વહેવા લાગ્યા હતા. અહીં તમને બતાવી દઈએ કે, એક દિવસ પહેલા જ બાંગ્લાદેશને વનડે મેચમાં અફઘાનિસ્તાન સામે હારનો સામનો કરવો પડ્યો હતો.

તમીમ ઈકબાલે 3 વનડે શ્રેણીની પ્રથમ મેચમાં અફઘાનિસ્તાન સામેની હાર બાદ નિવૃત્તિનો નિર્ણય લીધો હતો. આ મેચથી જ તેની કેપ્ટનશિપની ટીકા થઈ રહી હતી. ચાહકો તેને કોસતા રહ્યા હતા. બાંગ્લાદેશ ક્રિકેટ બોર્ડે ઈકબાલના ઉત્તરાધિકારીનું નામ જાહેર કર્યું નથી, પરંતુ શાકિબ અલ હસન T20 અને લિટન દાસ ટેસ્ટ ટીમની કમાન સંભાળી રહ્યા છે. એવું સંભવ છે કે, આ બંનેમાંથી કોઈ એકને એક વનડેની પણ કેપ્ટનશિપ સોંપવામાં આવે.

34 વર્ષીય તમીમ ઈકબાલે ગયા વર્ષે આ જ સમયે T20માંથી પણ નિવૃત્તિ લઈ લીધી હતી, કારણ કે યુવા ખેલાડીઓને તક મળવી જોઈએ. તે આ વર્ષે એપ્રિલમાં આયર્લેન્ડ સામે છેલ્લી ટેસ્ટ રમ્યો હતો.

આ નિર્ણય વિશે માહિતી આપતા તમીમ ઈકબાલે કહ્યું, 'મારા માટે આ અંત છે. મેં મારું સર્વશ્રેષ્ઠ આપ્યું છે. હું આ ક્ષણથી આંતરરાષ્ટ્રીય ક્રિકેટમાંથી નિવૃત્તિ લઈ રહ્યો છું. હું મારા તમામ સાથી ખેલાડીઓ, કોચ, BCB અધિકારીઓ, મારા પરિવારના સભ્યો અને મારા લાંબા પ્રવાસ દરમિયાન મારી સાથે રહેલા તમામનો આભાર માનું છું. તેઓએ મારામાં વિશ્વાસ રાખ્યો, હું આ માટે દરેકનો આભાર માનું છું. હું ચાહકોનો પણ આભાર માનવા માંગુ છું. તમારા પ્રેમ અને વિશ્વાસે મને બાંગ્લાદેશ માટે મારું સર્વશ્રેષ્ઠ આપવા માટે પ્રેરણા આપી છે. હું મારા જીવનના આગળના પડાવ તરફ જાઉં છું તે માટે તમારા આશીર્વાદ માંગું છું. મને તમારી પ્રાર્થનામાં યાદ રાખજો.'

Seeing Tamim Iqbal crying broke my heart.But I must say it was a timely decision.He always said he wanted the best for the team.His announcement of retirement rather than prioritizing the big event like the World Cup is proof of wanting the best of the team.A legend of Bangladesh pic.twitter.com/lXK3CtYYkF

— Samiul Alam Sami (@SsSamiulSami73) July 6, 2023

તમિમે ફેબ્રુઆરી 2007માં તેની ODI ડેબ્યૂ સાથે આંતરરાષ્ટ્રીય ક્રિકેટમાં પ્રવેશ કર્યો હતો અને વેસ્ટ ઈન્ડિઝમાં 2007 વર્લ્ડ કપમાં ભારત સામે બાંગ્લાદેશની જીતમાં મહત્વની ભૂમિકા ભજવી હતી. તે મેચમાં તેણે અડધી સદી ફટકારી હતી. તમિમે બાંગ્લાદેશ માટે સૌથી વધુ ODI રન (8313) અને સદી (14) બનાવ્યા છે અને વિરાટ કોહલી અને રોહિત શર્મા પછી સક્રિય ક્રિકેટરોમાં ત્રીજો સૌથી વધુ રન બનાવનાર ખેલાડી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.