Notifications

Favourite List

બેટ સ્ટમ્પ પર માર્યું, અમ્પાયર સાથે કરી દલીલ, હવે કેપ્ટન હરમનપ્રીતને મળશે સજા!

23 Jul, 2023
05:13 PM
PC: indiatv.in

ભારતીય મહિલા ક્રિકેટ ટીમે તાજેતરમાં બાંગ્લાદેશ પ્રવાસ પર ત્રણ વનડેની શ્રેણી રમી હતી. આ સિરીઝ ઘણી રોમાંચક અને વિવાદોમાં પણ રહી છે. શ્રેણીની પ્રથમ બે મેચમાં બંને ટીમોએ 1-1થી જીત મેળવી હતી. જ્યારે ત્રીજી વનડે મેચ ટાઈ રહી હતી. આ રીતે, આ શ્રેણી પણ બરાબરી પર રહી ગઈ.

પરંતુ ત્રીજી ODI વિવાદોથી ભરેલી હતી, જેમાં ભારતીય કેપ્ટન હરમનપ્રીત કૌરને LBW આઉટ આપવો પણ વિવાદાસ્પદ રહ્યો હતો. આ દરમિયાન હરમને ગુસ્સામાં બેટને સ્ટમ્પ પર માર્યું અને અમ્પાયર સાથે દલીલ પણ કરી. હવે આ માટે હરમનને મોટો દંડ થઈ શકે છે.

મીડિયા સૂત્રોના અહેવાલ મુજબ, એક મેચ અધિકારીએ જણાવ્યું છે કે, હરમનપ્રીત કૌર પર મેચ ફીના 75 ટકા સુધીનો દંડ થઈ શકે છે. તેણે કહ્યું કે આ નિયમોના લેવલ-2નું ઉલ્લંઘન છે, જે મેદાન પર ખેલાડીઓના વર્તન સાથે સંબંધિત છે.

મેચ અધિકારીએ કહ્યું, 'મેદાન પર બનેલી ઘટના (સ્ટમ્પ પર બેટ મારવા) માટે તેને (હરમનપ્રીત) મેચ ફીના 50 ટકા સુધીનો દંડ ફટકારવામાં આવશે. જ્યારે મેચ બાદ પ્રેઝન્ટેશન દરમિયાન હરમને અમ્પાયર પર કેટલાક આરોપો લગાવ્યા હતા. તેના માટે તેને મેચ ફીના 25 ટકા દંડ ફટકારવામાં આવશે.'

એટલું જ નહીં હરમનને 3 ડીમેરિટ પોઈન્ટ પણ મળી શકે છે. આમાં, મેદાન પરના તેમના વર્તનને લઈને બે મુદ્દા હશે. જ્યારે મેચ બાદ તેણે અમ્પાયર પર લગાવેલા આરોપો માટે તેને એક ડીમેરિટ પોઈન્ટ મળશે. વાર્તા અહીં જ પૂરી નથી થતી.

એવું કહેવામાં આવી રહ્યું છે કે, હરમને કેટલીક આવી ટિપ્પણીઓ પણ કરી હતી, જેના કારણે બાંગ્લાદેશ ટીમની કેપ્ટન નિગાર સુલ્તાનાએ સત્તાવાર ફોટો સેશન દરમિયાન પીછેહઠ કરવી પડી હતી.

હકીકતમાં, ત્રીજી વનડેમાં બાંગ્લાદેશની ટીમે પ્રથમ બેટિંગ કરતા 225 રન બનાવ્યા હતા. આ પછી, લક્ષ્યનો પીછો કરતી વખતે, ભારતીય ટીમની બેટિંગની શરૂઆત સારી રહી ન હતી, પરંતુ ટીમ સ્થિર રહી હતી. પરંતુ 34મી ઓવરમાં હરમનપ્રીતના રૂપમાં ટીમને ચોથો મોટો ઝટકો લાગ્યો હતો.

34મી ઓવરના ચોથા બોલ પર હરમનપ્રીતે નાહિદા અખ્તરની બોલ પર સ્વીપ શોટ રમવાનો પ્રયાસ કર્યો, પરંતુ તે ચૂકી ગઈ. આવી સ્થિતિમાં બાંગ્લાદેશી ખેલાડીઓએ તેની સામે LBW આઉટ માટે અપીલ કરી હતી, જેના પર અમ્પાયરે તેને મોડું કર્યા વિના આઉટ જાહેર કરી દીધી હતી.

આ દરમિયાન હરમન કહેતી રહી કે બોલ બેટ સાથે અથડાયો હતો, પરંતુ અમ્પાયરે ઉતાવળમાં તેને આઉટ જાહેર કરી દીધી. મોટી વાત એ છે કે અમ્પાયરે હરમનના કેચ પકડવાની પણ રાહ ન જોઈ. સમજવા જેવી વાત એ છે કે, હરમન તે બોલ પર કેચ આઉટ થઈ શકતી હતી, પરંતુ અમ્પાયરે તેને LBW આઉટ આપી હતી. આવા નબળા અમ્પાયરિંગથી હતાશ થઈને હરમને બેટથી સ્ટમ્પ પર ફટકો માર્યો હતો.

હરમન આઉટ થતાની સાથે જ સતત વિકેટો પડવા લાગી અને ભારતીય ટીમ સ્થિર થઇ શકી નહીં. અંતે ભારતીય ટીમ પણ 225 રન બનાવીને ઓલઆઉટ થઈ ગઈ હતી અને આ મેચ ટાઈ થઈ હતી. મેચમાં 77 રન બનાવનાર હરલીન દેઓલને પ્લેયર ઓફ ધ મેચ જાહેર કરવામાં આવી હતી.

હરમનપ્રીતે કહ્યું, 'તેઓએ (બાંગ્લાદેશ) ખરેખર સારી બેટિંગ કરી, પરિસ્થિતિ અનુસાર બેટિંગ કરી. તે દોડીને રન ચોરી લેતા હતા. જ્યારે અમે બેટિંગ કરતા હતા ત્યારે અમે રમતને ખૂબ સારી રીતે નિયંત્રિત કરી હતી, પરંતુ મેં અગાઉ ઉલ્લેખ કર્યો છે તેમ, ખૂબ જ નબળા અમ્પાયરિંગે મેચની સ્થિતિ બદલી નાખી. અમ્પાયરો દ્વારા આપવામાં આવેલા કેટલાક નિર્ણયોથી અમે ખરેખર નિરાશ છીએ.'

ભારતીય કેપ્ટને કહ્યું, 'મને લાગે છે કે અમને આ રમતમાંથી ઘણું શીખવા મળ્યું છે. જે રીતે અમ્પાયરિંગ થયું તેનાથી અમને ખૂબ જ આશ્ચર્ય થયું. આગલી વખતે જ્યારે અમે બાંગ્લાદેશ આવીશું, ત્યારે અમે એ ખાતરી કરીશું કે, અમારે આ પ્રકારના અમ્પાયરિંગ સાથે કેવી રીતે વ્યવહાર કરવો અને તે મુજબ અમારી જાતને તૈયાર કરીશું.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.

ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp