ભારત નહીં ભૂલી શકે 10 વિકેટથી મળેલી હાર, બન્યા આ 5 શરમજનક રેકોર્ડ

ઓસ્ટ્રેલિયન ટીમે વિશાખાપટ્ટનમમાં ભારતીય ટીમને 10 વિકેટે હરાવીને સીરિઝ 1-1 થી બરાબરી કરી લીધી છે. હવે બંને જ ટીમો માટે ચેપોકની મેચ નિર્ણાયક રહેશે. ભારતીય ટીમ માટે આ હાર ઘણી બાબતે શરમજનક છે. ટીમ ન માત્ર 10 વિકેટથી હારી છે, પરંતુ પહેલા બેટિંગ કરતા પણ ભારતીય ખેલાડીઓ ઓસ્ટ્રેલિયન બોલિંગ આક્રમણ સામે ઘૂંટણીયે પડી ગયેલા નજરે પડ્યા. ભારતીય ટીમના નામે આ 5 શરમજનક રેકોર્ડ બની ગયા છે. ચાલો તો આ આર્ટિકલમાં આગળ જોઇએ કયા શરમજનક રેકોર્ડ ભારતીય ટીમના નામે બન્યા છે.

26 ઓવરમાં જ ઓલઆઉટ:

ભારતીય બેટ્સમેન આ મેચમાં પૂરી રીતે નિષ્ફળ સાબિત થયા અને સ્ટારોથી સજેલી ટીમ જેમ તેમ કરીને 26 ઓવર જ રમી શકી. આખી ટીમ માત્ર 117 રન પર જ સમેટાઇ ગઇ.

4 ખેલાડીઓના ન ખૂલી શક્યા ખાતા:

ભારતીય ટીમે આ મેચમાં વધુ એક શરમજનક રેકોર્ડ પોતાના નામે કર્યો છે અને એ છે 4 ખેલાડીઓ 0 પર આઉટ થવાનો. શુભમન ગિલ અને સૂર્યકુમાર યાદવ તો પોતાનું ખાતું પણ ન ખોલાવી શક્યા. પછી પૂછડિયામાંથી જ્યારે કસેલી ઇનિંગની આશા હતી તો મોહમ્મદ શમી અને સિરાજ પણ શૂન્ય પર આઉટ થઇ ગયા.

11 ઓવરમાં જ મળી હાર:

ઓસ્ટ્રેલિયાએ વન-ડેમાં અત્યાર સુધી સૌથી જલદી લક્ષ્ય હાંસલ કરીને ભારતીય ટીમને હરાવવાનો રેકોર્ડ બનાવ્યો છે. 11 ઓવરમાં જ ઓસ્ટ્રેલિયાએ 118 રન બનાવી લીધા અને આ 234 બૉલ બાકી રહેતા મોટી જીત હાંસલ કરી.

ભારતીય ટીમને 10 વિકેટે હરાવી:

ઓસ્ટ્રેલિયાએ ભારતને બીજી વખત વન-ડેમાં 10 વિકેટે હરાવી છે. આ અગાઉ વર્ષ 2020 મુંબઇના વાનખેડેમાં ઓસ્ટ્રેલિયન ટીમે ભારતીય ટીમને 10 વિકેટે હરાવી હતી.

સૂર્યકુમાર યાદવ સતત બીજી વખત શૂન્ય પર આઉટ થયો:

આ સીરિઝ ભારતના વિસ્ફોટક બેટ્સમેન સૂર્યકુમાર યાદવ માટે ખૂબ જ નિરાશાજનક રહી છે. તે સતત બીજી મેચમાં ખાતું ખોલ્યા વિના આઉટ થઇ ગયો.

મેચની વાત કરીએ તો ઓસ્ટ્રેલિયન ટીમે ટોસ જીતીને પહેલા ફિલ્ડિંગ કરવાનો નિર્ણય લીધો હતો. ભારતીય ટીમે પહેલા બેટિંગ કરતા 26 ઓવરમાં જ ઓલ આઉટ થઇ ગઇ. 4 ખેલાડી શૂન્ય પર આઉટ થઇ ગયા, જ્યારે 3 ખેલાડી ડબલ ડિજિટના આંકડા સુધી પણ ન પહોંચી શક્યા. ભારત તરફથી સૌથી વધુ રન વિરાટ કોહલી (31 રન) બનાવ્યા, જ્યારે અક્ષર પટેલે 29 રન બનાવ્યા. ઓસ્ટ્રેલિયા તરફથી બોલિંગ કરતા મિચેલ સ્ટાર્કે સૌથી વધુ 5 વિકેટ લીધી, જ્યારે શૉન એબોટને 3 જ્યારે નાથન એલિસને 2 વિકેટ મળી. ઓસ્ટ્રેલિયન ટીમે 118 રનનું લક્ષ્ય માત્ર 11 ઓવરમાં જ હાંસલ કરી લીધું.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.