લંડનના ઓવલ ક્રિકેટ ગ્રાઉન્ડમાં ભારત અને ઓસ્ટ્રેલિયા વચ્ચે વર્લ્ડ ટેસ્ટ ચેમ્પિયનશિપની ફાઈનલ જીતવાની લડાઈ ચાલુ છે. ભારતીય ટીમ આ મેચમાં હજુ ઘણી બધી પાછળ છે. ઓસ્ટ્રેલિયાની લીડ 300ને પાર કરી ગઈ છે. જો ભારતે આ મેચમાં જીત મેળવવી હોય તો ટીમના બેટ્સમેનોએ શાનદાર પ્રદર્શન કરવું પડશે. નહીં તો 10 વર્ષ બાદ ફરી એકવાર ICC ટ્રોફી જીતવાનું ટીમ ઈન્ડિયાનું સપનું અઘરું રહી જશે. આ દરમિયાન પાકિસ્તાનના એક પૂર્વ ક્રિકેટરે ભારતીય ટીમના કોચ રાહુલ દ્રવિડને લઈને મોટું નિવેદન આપ્યું છે.
પાકિસ્તાનના પૂર્વ ક્રિકેટર બાસિત અલીએ WTC ફાઈનલ મેચની વચ્ચે મોટું નિવેદન આપ્યું છે. તેણે રાહુલ દ્રવિડના કોચ બનવા પર સવાલ ઉઠાવ્યા છે. તેણે કહ્યું છે કે, કોચ તરીકે દ્રવિડ 'ઝીરો' છે. પોતાની યુટ્યુબ ચેનલ પર વાત કરતા બાસિત અલીએ કહ્યું કે, ભારત એ જ સમયે મેચ હારી ગયું જ્યારે ટીમે ટોસ જીતીને પહેલા બોલિંગ કરવાનો નિર્ણય કર્યો. બોલિંગ અંગે તેણે કહ્યું કે, ભારતીય બોલરોએ ખૂબ જ ખરાબ પ્રદર્શન કર્યું. લંચ બાદ ભારતીય બોલરો ખૂબ જ ખુશ દેખાઈ રહ્યા હતા.
બાસિત અલીએ કહ્યું કે, હું રાહુલ દ્રવિડનો મોટો પ્રશંસક છું અને હંમેશા રહીશ. તે એક લિજેન્ડ છે, પરંતુ કોચ તરીકે તે બિલકુલ 'ઝીરો' છે. તેણે વધુમાં કહ્યું કે, જ્યારે ભારત ઓસ્ટ્રેલિયામાં રમવા ગયું ત્યારે ત્યાંની પિચો ઉછાળવાળી હતી. ખબર નહીં આ મેચમાં તે શું વિચારી રહ્યો હતો. જ્યારે ઉપરવાળા અક્કલ વહેંચતા હતા, ત્યારે ખબર નહીં તેઓ કયા પર્વતોની પાછળ ક્યાં છુપાયેલા હતા.
બાસિતે તો એમ પણ કહ્યું કે જ્યારે કેપ્ટન રોહિત શર્માએ ટોસ જીતીને પ્રથમ બોલિંગ કરવાનો નિર્ણય કર્યો ત્યારે જ ભારત મેચ હારી ગયું હતું. બાસિતે કહ્યું કે, ભારતે પ્રથમ બે કલાકને જોઈને નિર્ણય લીધો અને તેથી જ તેણે પ્રથમ બોલિંગનો નિર્ણય લીધો હતો. તેણે કહ્યું કે ભારતની બોલિંગ ટેસ્ટ લેવલની નથી પરંતુ IPL લેવલની છે.
આ પૂર્વ પાકિસ્તાની ક્રિકેટરે કહ્યું કે, હવે આ મેચમાં ભારતને કોઈ ચમત્કાર જ જીતાડી શકશે. તેણે કહ્યું કે, ભારત હવે એ જ કરી શકે એમ છે કે તે ટીમને શક્ય તેટલી ઝડપથી આઉટ કરવાની કોશિશ કરે અને ચોથી ઇનિંગમાં કોઈ ચમત્કાર થાય તેની આશા રાખે. ભારતે જે 120 ઓવર ફિલ્ડ કરી છે, તે સમયે મેં અજિંક્ય રહાણે, વિરાટ કોહલી અને રવિન્દ્ર જાડેજા સહિત માત્ર 2-3 ખેલાડીઓને જ ફિટ જોયા હતા. બાકીના બધા ખેલાડીઓ થાકેલા દેખાતા હતા.
15.jpg)
