આ શેરમાં એવો ભાવ ઉછળ્યો કે રેખાએ 10 મિનિટમાં 223 કરોડની કમાણી કરી

PC: facebook.com/RekhaJhunjunwala

શેરબજારના દિગ્ગજ રોકાણકાર અને જેમને લોકો બિગબુલના નામે ઓળખતા હતા તેવા સ્વ. રાકેશ ઝુનઝુનવાલાના પત્ની રેખા ફરી ચર્ચામાં આવ્યા છે. તેમના પોર્ટફોલિયોમાંના ટાટા ગ્રુપનો એક શેરે એવો હનુમાન કુદકો માર્યો કે રેખાને માત્ર 10 જ મિનિટમાં 223 કરોડ રૂપિયાની અધધધ કમાણી થઇ ગઇ હતી. ટાટા ગ્રુપનો  આ શેર સ્વ. રાકેશ ઝુનઝુનવાલાનો હોટ ફેવરીટ શેર હતો અને હવે તેમના પત્ની માટે પણ આ શેર નસીબવંતો સાબિત થઇ રહ્યો છે.

શેરબજારમાં આમ તો ગુરુવારે ધીમી શરૂઆત થઇ હતી, પંરતુ માર્કેટ ખુલતાની સાથે જ ટાટા ગ્રુપની કંપની ટાઇટનનો શેર જબરદસ્ત ઉછળી ગયો હતો. બજાર ખુલ્યું ત્યારે ટાઇટનના શેરનો ભાવ 2569.30 રૂપિયા પર હતો અને 10 મિનિટ પછી સીધો ઉચલીને 2619 રૂપિયા પર પહોંચી ગયો હતો. મતલબ કે 10 મિનિટમાં શેરના ભાવમાં 50 રૂપિયા વધી ગયા હતા. જો કે એ પછી શેરનો ભાવ ઘટ્યો છતા બંધ થવાના સમયે ઉપરના નિશાન પર હતો.

ટાઇટન કંપનીના  2023ના માર્ચ ત્રિમાસિક ગાળાના શેર હોલ્ડીંગ પેટર્ન પર નજર નાંખીએ તો દિવંગત રાકેશ ઝુનઝુનવાલાના પત્ની રેખા ઝુનઝુનવાલા પાસે ટાઇટનના 4,69,45,970 શેરો છે. મતલબ કે તેમની કંપનીમાં 5.29 ટકા હિસ્સેદારી છે. આ પહેલાં ઓકટોબર- ડિસેમ્બર ત્રિમાસિક ગાળામાં રેખા ઝુનઝુનવાલા પાસે 4,58,95,970 શેરો હતા.

રેખા ઝુનઝુનવાલાએ માર્ચ મહિનાના ત્રિમાસિક ગાળામાં ટાઇટન કંપનીના 10.50 લાખ શેરો ખરીદ્યા હતા. હવે શેર હોલ્ડીંગની પેટર્ન મુજબ જોઇએ તો ટાઇટનના શેરનો ભાવ 10 મિનિટમાં 49.70 રૂપિયા વધ્યો. તેની સામે રેખા ઝુનઝુનવાલા પાસેના કુલ શેરો 4,69,45,970 નો ગુણાકાર કરીએ તો 233 કરોડ રૂપિયા થાય છે.

આ મહિનામાં જારી થયેલા ફોર્બ્સના રિપોર્ટમાં 2023 બિલિયોનર્સ લિસ્ટમાં સામેલ થયેલા 16 નવા અબજોપતિમાં રેખા ઝુનઝુનવાલાને પણ સ્થાન મળ્યું છે.

રાકેશ ઝુનઝુનવાલાના અવસાન બાદ માત્ર રેખા ઝુનઝુનવાલા જ તેમનો પોર્ટફોલિયો સંભાળી રહ્યા છે. મીડિયા રિપોર્ટ્સ અનુસાર, વર્ષ 2002-03માં રાકેશ ઝુનઝુનવાલાએ માત્ર 3 રૂપિયાની સરેરાશ કિંમતે ટાઇટનના શેર ખરીદ્યા હતા, જે 2,619 રૂપિયાના સ્તરે પહોંચી ગયો છે. તમને જણાવી દઈએ કે ટાઈટન સ્ટોકનો 52 સપ્તાહનો હાઈ 2,791 રૂપિયા છે. જ્યારે તેનું 52 સપ્તાહનું નીચલું સ્તર 1825.05 રૂપિયા છે.

ટાઇટન કંપની વોચ અને જવેલરી બ્રાન્ડમાં અગ્રણી કંપની તરીકે જાણીતી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.

ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp