વિશ્વના કેટલાક દેશોમાં હાલના સમયે અત્યંત ઠંડી પડી રહી છે. પણ આજે આપણે એક એવા શહેરની વાત કરવાના છીએ, જે ફક્ત અને ફક્ત વધારે ઠંડી હોવાના કારણે જ આખા વિશ્વમાં જાણીતું છે. અહીં ઠંડી એટલી વધારે પડે છે કે, ત્યાં થર્મોમીટરનો પારો -71 ડિગ્રી સુધી પણ પહોંચી જાય છે.
અમે વાત કરી રહ્યા છીએ રશિયાના આ શહેર યાકુત્સ્કની. યાકુત્સ્ક શહેરની તસવીરો અને વીડિયો આ સમયે સોશિયલ મીડિયા પર ખૂબ જ વાયરલ થઇ રહ્યા છે. જેમાં લોકો બતાવી રહ્યા છે કે, તેઓ ત્યાં કેટલી ઠંડીનો સામનો કરી રહ્યા છે અને આ દરમિયાન તેમને કેવા કેવા પ્રકારની મુશ્કેલી પડી રહી છે. યાકુત્સ્કની રહેવાસી એક છોકરીની તસવીર આજે પણ સોશિયલ મીડિયા પર વાયરલ થઇ રહી છે, જેમાં તેની આંખની પાપણ જામી ગયેલી નજરે પડી રહી છે. આ શહેરમાં ઠંડીના કારણે પાણીની બોટલ પણ તૂટી ગઇ છે.
તસવીરોમાં તમે જોઇ શકો છો કે, કેવી રીતે આ વ્યક્તિના વાહન અને દાઢી પણ જામી ગયા છે. ત્યાં પારો માઇનસ 71 ડિગ્રી સુધી પહોંચી ગયો છે. ત્યાં ઇંડાથી લઇને નૂડલ અને ખાવાની અન્ય ચીજો પણ જામી ગઇ છે. યાકુત્સ્કની આબાદી 3.60 લાખ લોકોની છે. આ રશિયાના સાઇબેરિયાના યાકુટિકા રાજ્યની રાજધાની છે. ત્યાં રહેનારા લોકો માટે ઓક્ટોબરથી એપ્રિલ સુધીનો સમય મુશ્કેલીઓ ભરેલો હોય છે. જોકે, જુલાઇ સુધી પારો 24 ડિગ્રી સુધી પણ આવી જાય છે.
અહીં સામાન્ય રીતે સૂર્યોદય 10.30 વાગે થાય છે પણ તડકો ઘણા દિવસો સુધી નથી દેખાતો. બપોરે 3 વાગતા વાગતા સૂરજ ડૂબી જાય છે. ઠંડીથી બચવા માટે લોકો ત્યાં ઘણા પ્રકારના ઉપાય કરે છે. જેમ કે, વિશેષ પ્રકારના ઇન્સુયલેટેડ કપડા પહેરે છે, હરણના ચામડાના બૂટ પહેરે છે, ફરથી બનેલા લાંબા કોટ અને સ્કાર્ફ પણ પહેરે છે. ડિસેમ્બર મહિનાથી ફેબ્રુઆરી મહિના સુધીના સમયમાં ત્યાં ખૂબ જ ઠંડી પડે છે અને ત્યાં દિવસો મુશ્કેલી ભરેલા હોય છે. જોકે, આ દરમિયાન ત્યાં ક્રિસમસ અને નવા વર્ષ કે કોઇપણ તહેવારમાં કોઇપણ પ્રકારનો ભંગ પડતો નથી.
પીવાના પાણીની વાત કરીએ તો ત્યાં લોકોએ તેના માટે બરફને ગરમ કરવો પડે છે. પહેલા લોકો નદીમાંથી બરફના ટુકડા તોડીને લાવે છે અને પછી તેને ગરમ કરે છે અને ત્યાર બાદ તેમને પીવાનું પાણી મળે છે. લોકોનું કહેવું છે કે, જો તેઓ બહાર નીકળે છે તો વીસ મીનિટમાં જ તેમનો ચહેરો અને આંગળીઓ સુન્ન પડવા લાગે છે. તેથી તેઓ વધારે સમય સુધી બહાર નથી રહેતા. લોકો રાતે પબ અને નાઇટક્લબમાં પણ જાય છે. ત્યાં લોકોની સરળતા માટે પબ્લિક ટ્રાન્સપોર્ટ પણ ઉપલબ્ધ છે.
15.jpg)
