67 વર્ષની ઉંમરે બિલ ગેટ્સને થયો ફરી પ્રેમ, જાણો કોને ડેટ કરી રહ્યા છે?

પ્રેમને ઇઝહાર કરવાના દિવસ વેલેન્ટાઇન્સ ડે ને હવે 2 જ દિવસની વાર છે ત્યારે દુનિયાના ટોપ-10ની યાદીમાં 6ઠ્ઠા નંબર પર રહેલા અને માઇક્રોસોફ્ટના સ્થાપક બિલ ગેટ્સની લવ સ્ટોરી સામે આવી છે.

માઈક્રોસોફ્ટ કંપનીના સ્થાપક બિલ ગેટ્સ છૂટાછેડાના દોઢ વર્ષ બાદ ફરી પ્રેમમાં પડ્યા છે. તેઓ ઓરેકલના CEO માર્ક હર્ડની વિધવા પૌલા હર્ડ સાથે રિલેશનશીપમાં છે. માર્ક હર્ડ 2019 માં કેન્સરથી મૃત્યુ પામ્યા હતા, જ્યારે બિલ ગેટ્સ અને તેમની પત્ની મેલિન્ડાએ ઓગસ્ટ 2021 માં છૂટાછેડા લીધા હતા.

ગયા મહિને, ગેટ્સ અને હર્ડ મેલબોર્નમાં ઓસ્ટ્રેલિયન ઓપનની મેન્સ સિંગલ્સની ફાઇનલમાં સાથે બેઠા હતા. ત્યારથી તેમની વચ્ચે સંબંધની અફવાઓ ઉડી રહી હતી. સૂત્રોનું કહેવું છે કે 67 વર્ષના બિલ ગેટ્સ અને 60 વર્ષના પૌલા એક વર્ષથી વધુ સમયથી ડેટિંગ કરી રહ્યા છે, પરંતુ પૌલાએ હજુ સુધી બિલ ગેટ્સના બાળકો સાથે મુલાકાત કરી નથી.

કપલના એક મિત્રએ જણાવ્યું કે બંને હંમેશા સાથે જોવા મળે છે. બંને એક વર્ષથી સાથે છે અને પૌલાને મીડિયામાં મિસ્ટ્રી વુમન એટલે કે રહસ્યમયી સ્ત્રી કહેવામાં આવે છે. પરંતુ બંનેના નજીકના મિત્રો જાણે છે કે તેઓ પ્રેમ સંબંધમાં છે.

પૌલા હર્ડ એક ઇવેન્ટ પ્લાનર અને સમાજસેવિકા છે. મીડિય રિપોર્ટ્સ અનુસાર, પૌલા હર્ડ અને બિલ ગેટ્સ ટેનિસના શોખીન છે અને પૌલાના પતિ માર્કના મૃત્યુ પહેલા પણ બંને ઘણી ટેનિસ ટૂર્નામેન્ટમાં એકબીજાને મળતા રહ્યાં છે.

પૌલાને બે પુત્રીઓ છે કેથરિન અને કેલી, જ્યારે બિલ ગેટ્સને ત્રણ બાળકો છે - જેનિફર, રોરી અને ફોબી. મેલિન્ડા અને બિલ ગેટ્સે લગ્નના 30 વર્ષ પછી મે 2021 માં તેમના છૂટાછેડાની જાહેરાત કરી, જે ઓગસ્ટ 2021 માં અંતિમ બની. બંનેએ કહ્યું હતું કે તેઓ તેમના ફાઉન્ડેશન - બિલ અને મેલિન્ડા ગેટ્સ ફાઉન્ડેશન સાથે મળીને ચલાવવાનું ચાલુ રાખશે.

MELINDA

બિલ ગેટ્સ દુનિયાના છઠ્ઠા નંબરના સૌથી અમીર છે અને તેમની નેટવર્થ 105 અરબ ડોલર ઠે. 1975માં તેમણે માઇક્રોસોફ્ટની સ્થાપના કરી હતી. બિલ ગેટ્સનું નામ કંપનીની મહિલા સહકર્મી સાથે પણ જોડાયેલું હતું. બંને વચ્ચે અફેર હોવાના સમાચાર આવ્યા હતા. વર્ષ 2019 માં, માઇક્રોસોફ્ટની એક મહિલા એન્જિનિયરે એક પત્ર લખીને બિલ ગેટ્સ સાથેના તેના સંબંધોનો ખુલાસો કર્યો હતો. તેણે લખ્યું કે તે ગેટ્સ સાથે ઘણા વર્ષોથી રિલેશનશિપમાં છે. ગેટ્સની પૂર્વ પત્ની મેલિન્ડાએ પણ એક ઇન્ટરવ્યૂમાં આ વાત કબુલી હતી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.