ટ્રમ્પને કારણે, USમાં સમય પહેલા બાળકોના જન્મ કરાવવા ભારતીય મહિલાઓની લાઇન લાગી

અમેરિકાના નવા રાષ્ટ્રપતિ ડોનાલ્ડ ટ્રમ્પે પદ સંભાળતાની સાથે જ જન્મના આધારે અમેરિકન નાગરિકતા નાબૂદ કરવાની જાહેરાત કરી. ટ્રમ્પે આદેશ લાગુ કરવા માટે 30 દિવસનો સમય આપ્યો છે. આ આદેશના અમલ પછી, ગેરકાયદેસર ઇમિગ્રન્ટ્સ અથવા વિઝા પર અમેરિકામાં રહેતા લોકોના બાળકો, જેમનો જન્મ અમેરિકામાં થયો છે, તેઓ અમેરિકન નાગરિકતા મેળવી શકશે નહીં. ટ્રમ્પની આ જાહેરાત સાથે, અમેરિકામાં સમય પહેલા ડિલિવરી કરાવવાનો પ્રવાહ શરૂ થઈ ગયો છે.

ગેરકાયદેસર રીતે રહેતી અથવા વિઝા પર રહેતી સગર્ભા સ્ત્રીઓ સમય પહેલાં C-સેક્શન દ્વારા ડિલિવરી કરાવવા માંગે છે, જેથી તેમના બાળકને US નાગરિકતા મળે અને બાળકના કારણે, તેમને અને તેમના પતિઓને USમાં રહેવાનું કાનૂની કારણ પણ મળી જાય.

ટ્રમ્પે 20 જાન્યુઆરીએ પદ સંભાળતાની સાથે જ જન્મજાત નાગરિકતાના અધિકારને નાબૂદ કરવાની જાહેરાત કરી હતી. ટ્રમ્પનો આ આદેશ 20 ફેબ્રુઆરીથી અમલમાં આવશે. આને ધ્યાનમાં રાખીને, અમેરિકામાં ગેરકાયદેસર રીતે અથવા વિઝા પર રહેતી અને જે મહિલાઓ ગર્ભાવસ્થાના સાતમા કે આઠમા અઠવાડિયામાં છે, તેઓ 20 ફેબ્રુઆરી પહેલા બાળકોને જન્મ આપવા માટે ક્લિનિક્સમાં અરજી કરી રહી છે.

ન્યુ જર્સીના એક મેટરનિટી ક્લિનિકના ડૉ. S.D. રમા કહે છે કે, જ્યારથી ટ્રમ્પે જન્મજાત નાગરિકતા સમાપ્ત કરવાની વાત કરી છે, ત્યારથી સમય પહેલા પ્રસૂતિ કરાવવા માટે આવતી મહિલાઓની સંખ્યામાં ઘણો વધારો થયો છે.

US બંધારણના 14મા સુધારામાં બાળકોને જન્મજાત નાગરિકત્વની ખાતરી આપવામાં આવી હતી. ટ્રમ્પે 150 વર્ષથી ચાલી રહેલા આ કાયદાને રદ કર્યો.

ડૉ. રમાએ કહ્યું કે, તેમના ક્લિનિકમાં સમય પહેલા C-સેક્શન ડિલિવરી માટે ફોન કરતી મોટાભાગની મહિલાઓ ભારતીય મહિલાઓ છે. આ બધી મહિલાઓ 20 ફેબ્રુઆરી પહેલા તેમની ડિલિવરી સુનિશ્ચિત કરવા માંગે છે.

મીડિયા સૂત્રો સાથે વાત કરતા, ડૉ. રમાએ કહ્યું, 'સાત મહિનાની એક ગર્ભવતી મહિલા તેના પતિ સાથે મારી પાસે આવી હતી. તેને માર્ચમાં પ્રસૂતિ થવાની છે, પરંતુ તે 20 ફેબ્રુઆરી પહેલા C-સેક્શન દ્વારા પ્રસૂતિ કરાવવા માંગે છે.'

ટેક્સાસના પ્રસૂતિશાસ્ત્રી અને ગાયનેકોલોજિસ્ટ ડૉ. S.G. મુક્કાલા પણ કહે છે કે, છેલ્લા બે દિવસમાં 15-20 યુગલો સમય પહેલા ડિલિવરી અંગે તેમની પાસે આવ્યા છે.

તેઓ કહે છે, 'હું તે યુગલોને કહી રહી છું કે, સમય પહેલા ડિલિવરી શક્ય છે, પરંતુ તેમાં માતા અને બાળક માટે જોખમ ઊભું થતું હોય છે. સમય પહેલા ડિલિવરીને કારણે બાળકના ફેફસાં યોગ્ય રીતે વિકાસ કરી શકતા નથી, તેમને દૂધ પીવામાં સમસ્યા થાય છે, જન્મ સમયે બાળકનું વજન ઓછું હોય છે, તેમને ન્યુરોલોજીકલ સમસ્યાઓ થઈ શકે છે.'

દર વર્ષે ભારતમાંથી હજારો લોકો H-1B વિઝા પર નોકરી માટે અમેરિકા જાય છે. અમેરિકામાં કાયમી નિવાસ માટે ગ્રીન કાર્ડ મેળવવું અત્યંત મુશ્કેલ બની ગયું છે, કારણ કે નોકરીના આધારે ગ્રીન કાર્ડ માટે અરજી કરનારા લોકોની સંખ્યા લાખોમાં છે અને આટલા બધા લોકોને મંજૂરી મેળવવામાં લગભગ 200 વર્ષ લાગી જશે.

એટલા માટે લોકો અમેરિકામાં બાળકો પેદા કરવાને અમેરિકામાં રહેવાની સુવર્ણ તક તરીકે જુએ છે. આનાથી તેમને લાંબા સમય સુધી અથવા કાયમી ધોરણે અમેરિકામાં રહેવાની ટિકિટ મળે છે. પ્યુ રિસર્ચ સેન્ટરના 2022ના અહેવાલ મુજબ, 1.6 મિલિયન ભારતીય બાળકોએ અમેરિકામાં જન્મેલા હોવાના કારણે નાગરિકતા મેળવી છે.

વરુણ (નામ બદલ્યું છે) તેની પત્ની પ્રિયા (નામ બદલ્યું છે) સાથે 8 વર્ષ પહેલાં H-1B વિઝા પર અમેરિકા આવ્યા હતા. તે છેલ્લા છ વર્ષથી ગ્રીન કાર્ડની રાહ જોઈ રહ્યા છે, જેથી તેમને અમેરિકામાં કાયમી નિવાસ મળી શકે. તે કહે છે, 'હું ઇચ્છું છું કે મારું બાળક અમેરિકામાં જન્મે. અમે છ વર્ષથી ગ્રીન કાર્ડની રાહ જોઈ રહ્યા છીએ. અમારા પરિવાર માટે સ્થિરતા સુનિશ્ચિત કરવાનો આ એકમાત્ર રસ્તો છે. 34 વર્ષીય પ્રિયા માર્ચની શરૂઆતમાં બાળકને જન્મ આપવાની છે.

28 વર્ષીય H-1B વિઝા ધારક કહે છે કે, તેની પત્ની થોડા અઠવાડિયામાં પ્રસૂતિ કરવાની છે અને તે ઇચ્છે છે કે ડિલિવરી 20 ફેબ્રુઆરી પહેલા થાય. તે કહે છે, 'અમે અહીં આવવા માટે ઘણું બધું દાવ પર લગાવ્યું હતું. હવે એવું લાગે છે કે અમેરિકાનો દરવાજો અમારા ચહેરાની સામે બંધ થઈ રહ્યો છે.'

ટ્રમ્પના આ નિર્ણયથી અમેરિકામાં ગેરકાયદેસર રીતે રહેતા ઇમિગ્રન્ટ્સ માટે વધુ સમસ્યાઓ ઊભી થશે. કેલિફોર્નિયામાં રહેતો વિજય (નામ બદલ્યું છે) ગેરકાયદેસર રીતે અમેરિકામાં પ્રવેશ્યો હતો અને છેલ્લા 8 વર્ષથી ત્યાં રહેતો હતો. તેની પત્ની સાત મહિનાની ગર્ભવતી છે.

તેમનું કહેવું છે કે, ટ્રમ્પ વહીવટીતંત્રના નિર્ણયથી તેઓ ખૂબ જ વ્યથિત થઈ ગયા છે. વિજય કહે છે, 'અમે આશ્રય મેળવવાની માંગણીનું વિચાર્યું પણ પછી મારી પત્ની ગર્ભવતી થઈ અને અમારા વકીલે અમને સૂચવ્યું કે, બાળક દ્વારા અમને આપમેળે અમેરિકન નાગરિકતા મળી જશે. પણ હવે અમને કોઈ રસ્તો દેખાતો નથી.'