સ્વીડનના નેતાએ કુરાન બાળી; મુસ્લિમ દેશોમાં ફેલાયો આક્રોશ

તુર્કી અને સ્વીડનના સંબંધોમાં આ દિવસોમાં તણાવ વધી ગયો છે. અહીં સ્વીડનમાં, તુર્કી વિરુદ્ધ જબરદસ્ત વિરોધનો સમયગાળો ચાલી રહ્યો છે. શનિવારે સ્ટોકહોમમાં તુર્કી વિરુદ્ધ વિરોધ પ્રદર્શન દરમિયાન ઇસ્લામિક વિરોધી ઉગ્રવાદીઓ દ્વારા કુરાનની એક નકલ સળગાવી દેવામાં આવી છે. આ ઘટના બાદ આંતરરાષ્ટ્રીય સ્તરે તેની નિંદા થઈ રહી છે. આ ઘટના પર નારાજગી વ્યક્ત કરતા તુર્કીએ સ્વીડનના રક્ષા મંત્રીની અંકારાની પ્રસ્તાવિત મુલાકાતને એકતરફી રીતે રદ્દ કરી દીધી છે. અને સ્વીડનને ગુનેગારો સામે જરૂરી કાર્યવાહી કરવા જણાવ્યું હતું.

તુર્કીના સત્તાવાળાઓએ દક્ષિણપંથી સ્વીડિશ-ડેનિશ રાજકારણી રાસ્મસ પાલુદાનને શનિવારે સ્વીડિશ રાજધાનીમાં તેના દૂતાવાસની સામે વિરોધ કરવા માટે આપવામાં આવેલી પરવાનગીની પણ નિંદા કરી હતી. પ્રદર્શન દરમિયાન, પાલુદને ઇસ્લામ પર આકરા પ્રહારો કર્યા અને કુરાનને લાઇટર વડે આગ લગાવી દીધી. તેણે ભીડને કહ્યું, 'જો તમને નથી લાગતું કે અભિવ્યક્તિની સ્વતંત્રતા હોવી જોઈએ, તો તમારે બીજે ક્યાંક રહેવું પડશે.'

અત્રે ઉલ્લેખનીય છે કે, સ્વીડનમાં અભિવ્યક્તિની સ્વતંત્રતા બંધારણ દ્વારા માર્ગદર્શન આપવામાં આવે છે. અને બંધારણ લોકોને તેમના વિચારો જાહેરમાં વ્યક્ત કરવાનો વ્યાપક અધિકાર આપે છે. જો કે, હિંસા અથવા અપ્રિય ભાષણ માટે ઉશ્કેરવાની મંજૂરી નથી. ગયા વર્ષે, પાલુદને મુસ્લિમ પવિત્ર રમઝાન માસ દરમિયાન કુરાન સળગાવવાની તેની 'ટૂર'ની જાહેરાત કરી હતી. આ પછી આખા સ્વીડનમાં રમખાણો ફાટી નીકળ્યા.

રાસમસ પાલુદાન સ્વીડનના દક્ષિણપંથી નેતા અને ડેનિશ-સ્વીડિશ રાજકારણી છે. તે કટ્ટર દક્ષિણપંથી પક્ષ સ્ટ્રામ કુર્સ (હાર્ડ લાઇન)ના વડા છે. તેઓએ ઘણા કાર્યક્રમોનું આયોજન કર્યું છે, જ્યાં કુરાન બાળવામાં આવી હતી, જેના કારણે હિંસાની ઘણી ઘટનાઓ સામે આવી હતી. ગયા અઠવાડિયે, તેણે સ્ટોકહોમમાં તુર્કીના રાષ્ટ્રપતિ રેસેપ તૈયપ એર્દોગનનું પૂતળું બાળ્યું હતું. પ્રદર્શન માટે પોલીસ પાસેથી મળેલી પરવાનગીએ જણાવ્યું હતું કે, તેમનો વિરોધ ઇસ્લામ વિરુદ્ધ હતો અને તુર્કીના રાષ્ટ્રપતિ એર્ડોગન દ્વારા તેને સ્વીડનમાં અભિવ્યક્તિની સ્વતંત્રતાને પ્રભાવિત કરવાનો પ્રયાસ કહેવામાં આવ્યો હતો.

પાલુદને કુરાન બાળી નાખ્યા બાદ મુસ્લિમ દેશોમાંથી નિંદાનું પૂર આવ્યું. ઓર્ગેનાઈઝેશન ઓફ ઈસ્લામિક કોઓપરેશને તેને ઉશ્કેરણીજનક કાર્યવાહી ગણાવી હતી. એમ પણ કહ્યું કે, તે મુસ્લિમોને નિશાન બનાવે છે. સંગઠને વધુમાં કહ્યું કે, આ ઘટના તેમના પવિત્ર મૂલ્યોનું અપમાન કરે છે. સંગઠને સ્વીડનને આ ઘટના પાછળ જે લોકોનો હાથ છે તેને સજા કરવા કહ્યું છે. બીજી તરફ સાઉદી અરેબિયાએ 'સંવાદ, સહિષ્ણુતા અને સહઅસ્તિત્વના મૂલ્યોને ફેલાવવા, નફરત અને ઉગ્રવાદને નકારવાના મહત્વ પર ભાર મૂક્યો છે. ગલ્ફ કોઓપરેશન કાઉન્સિલે પણ આ વિરોધની નિંદા કરી છે.