USમાં અચાનક હજારો ફ્લાઈટ્સ રદ્દ, ચારે તરફ અંધારું, ઘરોની લાઈટ બંધ, શાળાઓ બંધ

અમેરિકામાં એક ભારે શક્તિશાળી વાવાઝોડું આવવાની ચેતવણી આપવામાં આવી છે, જેના કારણે હજારોની સંખ્યામાં  ફ્લાઈટ્સ રદ કરવામાં આવી છે અને પાવર સપ્લાય બંધ કરી દેવામાં આવ્યો છે. અમેરિકા હાલમાં સૌથી ખરાબ હવામાનની ઘટનાઓ સામે લડી રહ્યું છે. રાજધાની વોશિંગ્ટનમાં શાળાઓ બંધ કરી દેવામાં આવી છે અને લોકોને ઘરની અંદર જ રહેવા માટે પ્રશાસન દ્વારા કહેવામાં આવ્યું છે. હવામાન આગાહી કરનાર એજન્સીએ સોમવારે USમાં ટોર્નેડો સહિતના સૌથી વિનાશક વાવાઝોડાની ચેતવણી આપી હતી.

ગઈકાલે સાંજે 5 વાગ્યા પછી વોશિંગ્ટન વિસ્તારમાં વરસાદ પણ શરૂ થઇ ગયો હતો અને આકાશ ધીમે ધીમે વાદળોથી ઘેરાવા લાગ્યું હતું. આ ખરાબ પરિસ્થિતિમાં, રહેવાસીઓને ઘરની અંદર જ રહેવા સૂચના આપી દેવામાં આવી હતી. હવામાન વિભાગે ગ્રેટર DC વિસ્તાર માટે રાત્રે 9 વાગ્યા સુધી ટોર્નેડોની ચેતવણી બહાર પાડી હતી. મંગળવારે સવાર સુધી પૂરની ચેતવણી પણ આપવામાં આવી હતી. હવામાન વિભાગે કહ્યું કે, વાવાઝોડું ઘણા દૂર-દૂરના વિસ્તારોની અંદર અસર કરી શકે છે.

હવામાન વિભાગની એજન્સીએ ટેનેસીથી ન્યૂયોર્ક સુધીના 10 રાજ્યોમાં ટોર્નેડોના ફેલાવાની ચેતવણી આપી હતી. મીડિયા સૂત્રોએ FlightAwareના ડેટાને ટાંકીને અહેવાલ આપ્યો હતો કે, આવા હવામાનના કારણે સોમવાર બપોર સુધી 1,300 કરતાં પણ વધુ US ફ્લાઇટ્સ રદ કરવામાં આવી હતી અને 5,500 કરતાં વધુ ફ્લાઈટ્સને ઉડવામાં મોડી મંજૂરી આપવામાં આવી હતી, રવિવારના વાવાઝોડાના વિક્ષેપને કારણે બંધ કરાયેલ હાર્ટ્સફિલ્ડ-જેક્સન એટલાન્ટા ઇન્ટરનેશનલ એરપોર્ટ પરથી મોટી સંખ્યામાં ફ્લાઇટ્સને રદ કરવામાં આવી હતી. વ્હાઇટ હાઉસે રાષ્ટ્રપતિ જો બાઇડેનની ચાર દિવસીય મુલાકાત પણ અટકાવી દીધી છે. તેમના અન્ય કાર્યક્રમો અને આયોજનોને પણ રદ કરી દેવામાં આવ્યા છે.

વર્જિનિયાના લાઉડાઉન કાઉન્ટીમાં લગભગ 15,000 લોકો ઘરમાં વીજળી વગર જીવી રહ્યા છે. નેશનલ વેધર સર્વિસના હવામાનશાસ્ત્રી ક્રિસ સ્ટ્રોંગે ફેસબુક લાઈવ બ્રીફિંગમાં જણાવ્યું હતું કે, 'આ મિડ-એટલાન્ટિકમાં સૌથી પ્રભાવશાળી અને ગંભીર હવામાન ઘટનાઓ પૈકીની એક છે, કે જે આપણે ઘણા સમયથી જોઈ છે.' હવામાનની આગાહી કરતી એજન્સીએ ચેતવણી આપી છે કે, બપોર પછી તોફાન આવવાની શક્યતા છે. આ કારણે, ફેડરલ કર્મચારીઓને વહેલા ઘરે મોકલી આપવાની જરૂર છે, કે જેથી કરીને તેઓ પવન, કરા અને ટોર્નેડો વચ્ચે તેમની કારમાં અટવાઈ ન જાય.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.