અમે ભારત સાથે 3 યુદ્ધ લડ્યા, પાકિસ્તાને તેનો પાઠ ભણી લીધો:PM શાહબાઝનો સૂર બદલાયો

ભારતનો પાડોશી દેશ પાકિસ્તાન આ દિવસોમાં તેના સૌથી ખરાબ આર્થિક તબક્કામાંથી પસાર થઈ રહ્યું છે. આ આર્થિક સંકટ વચ્ચે પાકિસ્તાનના PM શાહબાઝ શરીફનું ભારતને લઈને એક નિવેદન સામે આવ્યું છે. તેમણે કહ્યું છે કે અમે (પાકિસ્તાન) ભારત સાથે ત્રણ યુદ્ધો લડ્યા છે અને પાકિસ્તાને તેનો પાઠ શીખ્યો છે.

PM શાહબાઝે અલ અરેબિયા TVને આપેલા ઈન્ટરવ્યુમાં કહ્યું છે કે, 'ભારત અને પાકિસ્તાન પાડોશી છે અને બંનેએ એકબીજા સાથે જ રહેવાનું છે. તેમણે કહ્યું કે, તે આપણા પર નિર્ભર કરે છે કે, આપણે શાંતિથી રહીએ, પ્રગતિ કરીએ, કે પછી એકબીજા સાથે લડીને આપણો સમય અને સંસાધન વેડફીએ. ભારત સાથે અમારે ત્રણ યુદ્ધો થયા અને તેનાથી માત્ર ગરીબી અને બેરોજગારી જ આવી છે. અમે અમારો પાઠ શીખી લીધો છે. અમે હવે શાંતિથી જીવવા માંગીએ છીએ અને અમારી સમસ્યાઓ હલ કરવા માંગીએ છીએ.'

તેમણે કહ્યું કે, 'અમે ગરીબી ખતમ કરવા માંગીએ છીએ, દેશમાં સમૃદ્ધિ લાવવા માંગીએ છીએ. અમારા લોકોને સારું શિક્ષણ, સારી આરોગ્ય સુવિધાઓ અને રોજગાર આપવા માંગીએ છીએ. અમે અમારા સંસાધનો બોમ્બ અને દારૂગોળો પર વેડફવા માંગતા નથી. આ જ સંદેશ હું PM મોદીને આપવા માંગુ છું.'

PM શાહબાઝે કહ્યું કે, અમારી પાસે એન્જિનિયર, ડોક્ટર અને કુશળ મજૂરો છે. હું ભારતના PM નરેન્દ્ર મોદીને કહેવા માંગુ છું કે, અમે આ બધાનો ઉપયોગ દેશની સમૃદ્ધિ માટે કરવા માંગીએ છીએ, જેથી પ્રદેશમાં શાંતિ પુનઃસ્થાપિત થાય જેથી કરીને બંને દેશો પ્રગતિ કરી શકે.

તેમણે કહ્યું કે, UAE ભારત અને પાકિસ્તાનને સાથે લાવવામાં મહત્વની ભૂમિકા ભજવી શકે છે.

PM શાહબાઝે સાઉદી અરેબિયા વિશે કહ્યું કે, તે મિત્ર રાષ્ટ્ર છે અને પાકિસ્તાન અને સાઉદી અરેબિયા વચ્ચે સદીઓથી મૈત્રીપૂર્ણ સંબંધો છે. પાકિસ્તાન અસ્તિત્વમાં આવ્યું તે પહેલાથી જ લાખો મુસ્લિમોના સાઉદી અરેબિયા સાથે ભાઈચારાના સંબંધો છે અને તેઓ મક્કા અને મદીનાની હજયાત્રા કરતા આવ્યા છે.

PM શાહબાઝે કહ્યું કે, UAE લાખો પાકિસ્તાનીઓ માટે બીજા ઘર જેવું છે. શેખ મોહમ્મદ બિન ઝાયેદ પાકિસ્તાનના ભાઈ અને સમર્થક છે.

નાહયાન એક મહાન મિત્ર છે અને પાકિસ્તાન તેના હૃદયમાં છે. તેમણે કહ્યું કે પાકિસ્તાન અને ગલ્ફ દેશોના નેતૃત્વએ વેપાર અને સંસ્કૃતિના ક્ષેત્રમાં પ્રગતિ કરી છે અને એકબીજાને સહકાર આપ્યો છે અને સાથે મળીને તેના તમામ સ્વરૂપોમાં આતંકવાદની નિંદા કરી છે.

وزیراعظم شہباز شریف کا العربیہ ٹی وی کے ساتھ خصوصی انٹرویو۔۔۔ https://t.co/Cm5BOeQSJr

— PML(N) (@pmln_org) January 16, 2023

આ દરમિયાન પાકિસ્તાનના PM શાહબાઝે ફરી એકવાર કાશ્મીરનો ઉલ્લેખ કરતા કહ્યું કે, હું PM મોદીને કહેવા માંગુ છું કે અમે શાંતિથી જીવવા માંગીએ છીએ. પરંતુ કાશ્મીરમાં જે થઈ રહ્યું છે તે બંધ થવું જોઈએ. માનવ અધિકારોનું ઉલ્લંઘન બંધ થવું જોઈએ.

આ દરમિયાન PM શાહબાઝે કહ્યું કે, ભારતના PM મોદીને મારો સંદેશ છે કે, આપણે વાટાઘાટોના ટેબલ પર બેસીને કાશ્મીર જેવા સળગતા મુદ્દા પર ગંભીર વાતચીત કરવી જોઈએ.

તેમણે કહ્યું કે, આપણે બંને દેશો પરમાણુ સંપન્ન રાષ્ટ્રો છીએ. જો બંને દેશો આ દિશામાં આગળ વધે તો શું થશે તે અલ્લાહ જાણે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.