ખેડૂતોને ખેતી કરવા માટે ભાડેથી મશીન મળશે, સરકારે લોન્ચ કરી આ એપ્લીકેશન

કેન્દ્ર સરકાર દ્વારા ખેડૂતો માટે એક મહત્ત્વ પૂર્ણ યોજનાની જાહેરાત કરવામાં આવી છે. આ યોજનામાં ખેડૂત પોતાના ખેતીના સાધનોથી કમાણી કરી શકશે અને કોઈ પણ મશીનરી ખરીદવાની ઈચ્છા હશે તો પણ સરકારની સહાયતા મળશે. ખેડૂતો માટે બહાર પાડવામાં આવેલી આ સ્કીમનું નામ છે 'કસ્ટમ હાયરિંગ સેન્ટર' સામાન્ય ભાષામાં કહેવામાં આવે તો જેમ લોકો એક જગ્યા પરથી બીજી જગ્યા પર જવા માટે ઓલા અને ઉબર જેવી એપની મદદથી ઓછા ભાડામાં કાર અથવા તો રીક્ષાનો ઉપયોગ કરી શકે છે તેમ આ સ્કીમની મદદથી ખેડૂતો ખેતી કરવા માટે ઉપયોગી એવા સાધનો ઓછા ભાડામાં મેળવી શકે છે.

ખેડૂતો આ સ્કીમનો વધારે લાભ લઇ શકે તે માટે સરકાર દ્વારા 'CHC Farm Machinery' નામની એક મોબાઈલ એપ્લીકેશન લોન્ચ કરવામાં આવી છે. આમાં ખેડૂત કોઈ પણ મશીનરી સસ્તા ભાડા પણ મંગાવી શકે છે. આ ઉપરાંત આ એપ્લીકેશનની મદદથી ખેડૂતો પ્રાઈવેટ કસ્ટમર બને છે, તો સરકાર દ્વારા 40% સુધીની નાણાકીય સહાય પણ આપવામાં આવે છે. જેમાં ખેડૂત વધારેમાં વધારે 60 લાખ રૂપિઆ સુધીનો પ્રોજેક્ટ પાસ કરાવી શકે છે એટલે કે, ખેડૂત તેની આસપાસના વિસ્તારના ખેડૂતોને ઉપયોગમાં આવતા એવા 60 લાખ રૂપિયાના સાધનોની ખરીદી શકે છે, જેમાં 24 લાખની સરકારની સહાયતા મળશે.

આ ઉપરાંત 6થી 8 ખેડૂતો એક સાથે મળીને પોતાનું કો-ઓપરેટીવ ગ્રુપ પણ બનાવી શકે છે. કોઈ પણ ખેડૂત પાસે કૃષિને લગતું કોઈ પણ સાધન હોય તો તે ખેડૂત પણ પોતાના સાધનનું રજીસ્ટ્રેશન કરાવી શકશે અને મશીન ભાડે આપી શકશે. કસ્ટમ હાયરિંગ સેન્ટર બનાવવા માટે કૃષિ મંત્રાલય દ્વારા 12 ભાષાઓમાં એપ્લીકેશન લોન્ચ કરવામાં આવી છે અને અત્યાર સુધીમાં 50,000 ખેડૂતો આ એપ્લીકેશનો ઉપયોગ પણ કરી ચૂક્યા છે.

સરકારનું માનવું એવું છે કે, ખેડૂતો તેને ઉપયોગી કોઈ પણ વસ્તુ ખરીદવાના બદલે ભાડા પર લેશે, તો તેનો ખર્ચ ઓછો થઇ જશે અને આવકમાં વધારો થશે. આ ઉપરાંત ખેડૂત આ એપ્લીકેશનની મદદથી બિજનેશ શરૂ કરશે, તો તેને સરકારની આર્થિક સહાય મળશે.

આ બાબતે મેકનાઈઝેશન એન્ડ ટેક્નૉલોજી ડિવિઝનના એડિશનલ કમિશનર વી.એન કાલેએ જણાવ્યું હતું કે, મશીનનું ભાડું સરકાર દ્વારા નક્કી કરવામાં આવ્યું નથી. તેમાં હરીફાઈ રાખવામાં આવી છે. આ હરીફાઈના કારણે ખેડૂતોને સસ્તી અને સારી સેવા મળશે.