અમદાવાદ: ગલ્લાવાળાએ સિગારેટ આપવાનો ઇનકાર કરતા શખ્સે તેના ઘરને આગ ચાંપી

શહેરના પૂર્વ વિસ્તારમાં એક ચકચારી ઘટના સામે આવી છે. અહીં પાનનો ગલ્લો ધરાવતા વેપારીએ એક શખ્સને સિગારેટ આપવાની ના પાડતા ઉશ્કેરાયેલા શખ્સે ઝઘડો કરી વેપારીના ઘરમાં આગ ચાંપી દીધી હતી, જેમાં ઘરનો સમાન બળીને ખાખ થઈ ગયો હતો. આ અંગે વેપારીએ શખ્સ સામે ફરિયાદ કરતા પોલીસે ગુનો નોંધી તપાસ શરૂ કરી છે.

નરોડામાં રહેતા અમિત મંગનાણી માતા-પિતા તથા ભાઈ સાથે રહે છે. તેઓ ઠક્કરનગર પોસ્ટ ઓફિસની પાસે જયશ્રી મહાકાલ નામથી પાનનો ગલ્લો ધરાવે છે. પાનના ગલ્લાની પાછળ તેમનું એક મકાન છે, જેમાં તેઓ ક્યારેક ક્યારેક રહે છે. દરમિયાન તેમનો મિત્ર તેમને મળવા માટે આવ્યો હતો. આથી અમિતભાઈ મિત્ર સાથે ગલ્લાની પાછળ આવેલા તેમના મકાનમાં બેઠા હતા. ત્યારે અનિકેત ખેરનાર નામનો શખ્સ અમિતભાઈ પાસે આવ્યો અને સિગારેટ માગી હતી, જેથી અમિતભાઈએ ગલ્લો બંધ થઈ ગયો હોવાનું કહી સિગારેટ આપવાનો ઇનકાર કર્યો હતો.

અમિતભાઈની આ વાત સાંભળીને અનિકેત ઉશ્કેરાયો હતો અને ઝઘડો કરવા લાગ્યો હતો. ત્યારબાદ તમે આ મકાનમાં ભેગા થઈ ભુવા ધુણાવો છો બલી ચઢાવો છો તેમ કહી ગાળો બોલવા લાગ્યો હતો, જેથી અમિતભાઈએ પોલીસને જાણ કરતા પોલીસ ત્યાં આવી પહોંચી હતી. ત્યાર બાદ અમિતભાઈ નરોડા ખાતેના પોતાના મકાને ગયા હતા. દરમિયાન તેમને ફોન આવ્યો કે તમારા ઘરમાં આગ લાગી છે અને અનિકેત ત્યાં ઊભો હતો. અમિતભાઈ ત્યાં ગયા હતા ત્યારે અનિકેત ત્યાંથી ભાગી ગયો હતો. આગના કારણે અમિતભાઈના ઘરનો સમાન બળીને ખાખ થઈ ગયો હતો. આ અંગે અમિતભાઈએ અનિકેત ખેરનાર સામે પોલીસ ફરિયાદ નોંધાવતા પોલીસે ગુનો નોંધી વધુ તપાસ હાથ ધરી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.