ગુજરાતના 5 ગામના ખેડૂતો અચોક્કસ મુદતની હડતાળ પર,કહ્યું- નહીં તો હીજરત કરવી પડશે

ઉત્તર ગુજરાતના પાટણના સાંતલપુર તાલુકાના 5 ગામના ખેડુતોએ પાણીના મુદ્દે અચોક્કસ મુદતની ભુખ હડતાળ શરૂ કરી છે. ખેડુતોએ કેનાલમાં સિંચાઇના પાણીની માંગ સાથે વારાહી મામલતદાર કચેરી પર ધરણાં શરૂ કર્યા છે. ખેડુતોનું કહેવું છે કે જો અમારી માંગ સ્વીકારમાં નહીં આવશે તો અમારે હિજરત કરવી પડશે.

5 ગામના ખેડુતોએ અચોક્કસ મુદત માટે ભુખ હડતાળ શરૂ કરી છે. ખેડુતોનું કહેવું છે કે આ વિસ્તારમાં કેનાલ બનાવી ત્યારથી લઇને આજ સુધી ખેડુતોને પાણી મળતું નથી, જેને કારણે ખેડુતોની હાલત કફોડી બની ગઇ છે.

જાણવા મળેલી વિગત મુજબ ખેડુતો આર્થિક રીતે સદ્ધર બને તેના માટે સરકારે છેવાડાના ખેડુતો માટે નર્મદાની કેનાલો બનાવી હતી. જેને કારણે દરેક સિઝનમાં ખેડુતોને સિંચાઇ માટે સમયસર પાણી મળી રહે. ખેડુતોને પાણી સમયયર મળે તો તેઓ વર્ષમાં બેથી ત્રણ વખત અલગ પાકની ઉપજ મેળવીને આર્થિક રીતે સદ્ધર બની શકે.

ખેડુતોનું કહેવું છે કે સરકારે તો યોજના બનાવી, પરંતુ સિંચાઇ વિભાગના અણઘડ વહીવટને કારણે પાટણ જિલ્લાની કેનાલોની અનેક યોજનાઓ માત્ર કાગળ પર જ રહી ગઇ છે. પાણી નહીં મળવાને કારણે ખેડુતોની આશાઓ પર પાણી ફરી રહ્યું છે.

આ વાતથી પરેશાન સાંતલપુર તાલુકાના દહીંગામડા, પરશુંદ, છાણસરા, સીધાડાના ખેડુતોએ વારાહી મામલતદારની ઓફિસે ભુખ હડતાળ શરૂ કરી છે.

ખેડુતોએ કહ્યુ કે પરસુંદ ડિસ્ટ્રીક કેનાલ બની ગઇ છે, પરંતુ ખેડુતોએ આજ દિવસ સુધી આ કેનાલમાં પાણી જોયું નથી. ખેડુતોની હાલત દયનીય એટલા માટે બનવા પામી છે કે, પાણીનો બીજો કોઇ પાણીનો સ્ત્રોત નથી. મતલબ કે ખેડુતોએ માત્ર ચોમાસા જ પર આધાર રાખવો પડે છે. જો વરસાદ સારો થયો તો ઠીક, નહીં તો ખેતરો વાવેતર કર્યા વગર વેરાન પડી રહે છે.

ખેડુતોએ કહ્યુ કે, હવે ગળે આવી ગયા છીએ. અમારી પાસે હવે હિજરત કરવા સિવાય કોઇ વિકલ્પ બચ્યો નથી. અમે અચોક્કસ મુદતની હડતાળ પર ઉતરીને સરકાર પાસે માગં કરી રહ્યા છે કે અમારી સમસ્યાનો તાત્કાલિક ઉકેલ લાવવામાં આવે, નહીં તો અમારે ગામ છોડવા પડશે.

ગુજરાત ભલે સમૃદ્ધ રાજ્ય હોવા છતા ખેડુતોના આંદોલન વખતોવખત ચાલતા જ રહે. જગતના તાતની મુશ્કેલીનો અંત જ આવતો નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.